Սերժ Սարգսյան-Վադիմիր Պուտին հանդիպումից հետո երկու նախագահների համատեղ հայտարարության հետ կապված, որ Հայաստանը միանում է Մաքսային միությանը, այսօր Բաղրամյան 26-ի մոտ բողոքի ակցիա էր կազմակերպվել:
Ակցիային մասնակցում էր նաեւ ԱԻՄ առաջնորդ Պարույր Հայրիկյանը: Մենք նրանից հետաքրքրվեցինք՝ հաշվի առնելով, որ ՀՀԿ վերնախավը նույնիսկ երեկվա ընթացքում լրիվ այլ կողմնորոշման մասին էր պնդում, որ ստորագրելու ենք Ասոցացման համաձայնագիրը, կարո՞ղ ենք ասել, որ Սերժ Սարգսյանը երեկ ստիպված է նման որոշում ընդունել հենց այդ հանդիպման ժամանակ, քանի որ Պուտինը ճնշումներ է գործադրել: Պարույր Հայրիկյանը պատասխանեց. «Այդ բնույթի հայտարարությունները, դրանք որոշում չեն, որոշում դառնալու համար դեռ պիտի ճանապարհ անցնեն: Մենք ունենք հնարավորություն նախ ճշտել՝ Սերժ Սարգսյանի նկատմամբ ճնշում եղե՞լ է: Ճնշումը պարտադիր չի, որ լինի անհատական, կարող է լինել տարբեր սպառնալիքների տեսքով: Եթե պետք է օգնել, ինչպես Լեւոն Տեր-Պետրոսյանը հայտարարում էր, որ որոշակի ուժերի ճնշման տակ ինքը…նույնն էլ կարող է ասել ինքը, եթե պետք է օգնել՝ օգնում ենք, ուժ ենք տալիս, աջակցություն ենք հայտնում եւ ասում ենք՝ շարունակիր քո գիծը: Եթե ինքը հեռացել է այն գծից, որը վաղուց համարվում էր մեր ժողովրդի գիծը, այդ դեպքում ինքը պետք է գնա իր ցանկացած ճանապարհով՝ անհատապես, բայց ոչ որպես ՀՀ նախագահ»:
Մենք ճշտեցինք՝ միանալով այս ակցիաներին՝ պահանջելու եք Սերժ Սարգսյանի հրաժարակա՞նը՝ նա պատասխանեց. «Ինչո՞ւ չէ: Սերժ Սարգսյանն էլ, բոլոր իշխանավորներն էլ ժամանակավոր են: Այդ ժամանակը կարելի է կրճատել, եթե իրենց լավագույն ձեւով չեն դրսեւորում»:
Հարցին՝ կարո՞ղ ենք համարել, որ Սերժ Սարգսյանն իր հայտարարությամբ կրակեց հայ ժողովրդի վրա՝ Պարույր Հայրիկյանը պատասխանեց. «Եթե դուք բանաստեղծական ձեւակերպումներ եք ուզում, ես միշտ չի, որ պատրաստ եմ այդպիսի ձեւակերպումներ տալու: Բանաստեղծական հակումներ ունեմ, բայց ոչ միշտ»:
Կարդացեք նաև
Հռիփսիմե ՋԵԲԵՋՅԱՆ
Հայրիկյանին ճանաչողները հավատում են` նա կպահանջի: