Բագրատաշենի անցակետի հարակից տարածքում քիչ առաջ կրկին իրավիճակը լարվեց: Հիշեցնենք, միջպետական ճանապարհի այդ հատվածը արդեն տեւական ժամանակ՝ փակ է: Մարդիկ դուրս են եկել փողոց՝ ի սատարումն Տավուշի, որտեղ կառավարությունը սահմանազատման-սահմանագծման «պիլոտային» ծրագիր է իրականացնում եւ առաջին սյուներն արդեն տեղադրվել են:
Այստեղ ոստիկանական մեծաքանակ ուժեր են կենտրոնացված:
Ոստիկաններն այդ հատվածից կրկին քաղաքացու բերման ենթարկեցին: Պաշտոնական պարզաբանում թեեւ չտվեցին, բայց խոսակցություններից հասկանալի դարձավ, որ հայհոյանքի համար են քաղաքացուն բերման ենթարկում: Բերման ենթարկվածի համագյուղացիները փորձում էին բացատրել, որ «մարդու տունը թուրքից 100 մետր հեռու է դառնում, դրա համար էլ վրդովվել է», բայց՝ ապարդյուն:
«Ես չեմ ուզում իմ ընտանիքը, իմ երեխեն թուրքի, մուսուլմանի տակ ապրի: Մենք մեր հողն ենք պահում»,- վրդովված ոստիկաններին դիմեց Հաղթանակ գյուղից Վալեր Մելքոնյանը՝ հորդորելով իրեն էլ զենք տան, ոստիկաններն էլ կանգնեն մարդկանց կողքին՝ միմյանց հետ հայրենիքը պահեն՝ «տղամարդավարի»: Նրա ընտանիքը արցախյան առաջին պատերազմի ժամանակ Ադրբեջանից բռնի տեղահանվել է. «Մի հետ եկել ենք, ստեղ ստեղծել ենք, մեր համար ապրում ենք, ես չեմ ուզում նորից կորցնենք: Ես պատրաստ եմ առաջինը գնամ՝ գոնե կիմանամ թուրքի գյուլլից եմ մեռել»:
Կարդացեք նաև
Փոխգնդապետ, ոստիկանության Տավուշի մարզային վարչության պետ Արթուր Մկրտչյանը հանգստացնում էր քաղաքացիներին՝ ասելով, որ կառավարությունը մտածում է հենց մարդկանց անվտանգության ու նրանց խնդիրները լուծելու համար. «Չեք կորցնի: Հետո՝ ուշ չի լինի: Ինձ հավատացեք: Թողեք հանգիստ, կառավարությունն էս ընթացակարգն անում է՝ չմեռնելու համար, մենք ոչ մեկս էլ չենք մեռնելու»:
Բայց երբ մարդիկ հստակ երաշխիքներից սկսեցին խոսել՝ գնդապետն արդեն պատասխաններ չուներ: Հետագա խոսակցությունը նա որակեց քաղաքական ու պնդեց՝ ՀՀ-ից հող չի տրվել, չի էլ տրվելու: Հարցին՝ Հայաստանը հող չունի՞, որ միայն տալիս ենք, գնդապետը պատասխանեց. «Ունի, ո՞նց չունի, մի խանգարեք, թողեք թող մարդիկ աշխատեն»:
Նելլի ԳՐԻԳՈՐՅԱՆ
