2013 թվականին Սյունիքի մարզի շրջակա միջավայրին հասցված վնասներից եւ տուգանքներից պետբյուջե մուտք եղած գումարը նախորդ տարվա համեմատ նվազել է: Ինչպես տեղեկացանք ՀՀ բնապահպանական պետական տեսչության Սյունիքի տարածքային բաժնից՝ 2013թ.-ին պետբյուջե մուտք եղած գումարը կազմել է 9 մլն 900 հազար դրամ, իսկ 2012թ.-ին՝ 17 մլն դրամ: Մոտ 15 մլն դրամ գումարի հասցված մի շարք գործեր էլ այս պահին դեռեւս գտնվում են դատական մարմիններում: 9 մլն 900 հազար դրամ գումարից միայն 4 մլն 235 հազար դրամը կազմել է ԻԻՀ քաղաքացու ավտոմեքենայի վթարի հետեւանքով ավտոցիստեռնից ճանապարհամերձ հողատարածք ու Կապան քաղաքի միջով հոսող Ողջի գետ թափված ժավելի խտահեղուկի հասված վնասից:
Ինչպես այն ժամանակ տեղեկացրել էինք՝ճանապարհամերձ հողատարածքի, Ողջի գետի աղտոտման եւ ձկների ոչնչացման հետեւանքով շրջակա միջավայրին պատճառված 4.235.000 ՀՀ դրամի վնասն ամբողջությամբ վերականգնվել էր: Ագարակի կոմբինատում բնապահապանական պետական տեսչության կողմից իրականացված ստուգումների արդյունքում էլ 474 հազար 600 դրամի վնաս էր հայտնաբերվել՝ կոմբինատի պոչատարից ջրային ռեսուրսների աղտոտում էր եղել: Մարզի ճանապարհաշինարարական ընկերությունները եւս շրջակա միջավայրին վնաս են հասցրել: Ստուգումների արդյունքում՝ այստեղ հողերի աղտոտման դեպքեր են հայտաբերվել: Մարզի հանքարդյունաբերական ընկերությունների կողմից շրջակա միջավայրին հասցված վնասներից առավել շատ գումարներ պետբյուջե մուտք էր արվել 2012թ.-ին: Ամենաշատ վնասը հասցվել էր «Դինո գոլդ մայնինգ քամփնի» ՓԲ ընկերություն (ներկայիս «Դանդի փրիշս մեթալս Կապան») կողմից: «Ընկերությունը 2012թ.-ին շրջակա միջավայրին հասցրել էր 7 մլն 300 հազար դրամի եւ 1 մլն 704,8 հազար դրամի վնասներ, Զանգեզուրի պղնաձամոլիբդենային կոմբինատի կողմից հասցվել էր 294 հազար դրամի վնաս, իսկ Ագարակի կոմբինատի կողմից վնաս չի արձանագրվել»,- փոխանցեցին Սյունիքի տարածքային բաժնից: 819 հազար դրամ էլ հաշվարկվել էր Իրանի քաղաքացու վարած ավտոմեքենայի վթարի հետեւանքով Վարարակն գետ թափված դիզվառելիքի հասցրած վնասից: Իսկ մնացածը՝ կենդանական եւ բուսական աշխարհին հասցված վնասներն են:
Մերի ՍՈՂՈՄՈՆՅԱՆ
