Ավարտվեց ՀՀԿ գործադիր մարմնի երկարատեւ նիստը: ԱԺ փոխնախագահ Էդուարդ Շարմազանովը տեղեկացրեց, որ նիստի ընթացքում քննարկվել են մի շարք ներկուսակցական, քաղաքական հարցեր, իսկ հիմնական քննարկումը ծավալվել է կուսակցության ապագա համագումարի վերաբերյալ, ինչն էլ որակելով իբրեւ քաղաքական հայտարարություն Էդուարդ Շարմազանովը ասաց, որ կուսակցության հերթական, 15-րդ համագումարը տեղի կունենա մայիս ամսին:
Պատասխանելով կառավարության հրաժարականի վերաբերյալ հարցին Էդուարդ Շարմազանովն ասաց. «Ցանկացած ժողովրդավարական երկրում կառավարությունները ձեւավորվում են ընտրությունների ժամանակ ու ՀՀ-ում էլ վերջին շրջանում տեղի է ունեցել երկու համապետական ընտրություն եւ, որի արդյունքում երկու անգամ էլ հաջողության է հասել իշխող քաղաքական ուժը եւ նրա առաջնորդ Սերժ Սարգսյանը: Ուստի սահմանադրությամբ օժտված լիազորություններով հենց քաղաքական մեծամասնությունը ներկայացրել է կառավարության կազմը: Մենք կառավարության հրաժարականի հարց չենք քննարկում, օրակարգում նման բան չկա, իսկ այն քաղաքական ուժերը, որոնք շատ են ցանկանում տեսնել կառավարության հրաժարականը, ես կարող եմ նրանց բարեկամական մաղթանք հղել, կարող են սթրեսից դուրս գալու համար մի բաժակ սառը ջուր խմել»:
Եվա ՀԱԿՈԲՅԱՆ
