Քիչ առաջ Գյումրու Վարդան Աճեմյանի անվան դրամատիկական թատրոնում հանդիսավորությամբ բացվեց երաժիշտ- կատարողների «Վերածնունդ» միջազգային 6-րդ մրցույթ-փառատոնը: Ինչպես արդեն տեղեկացրել ենք, այս տարի փառատոնին մասնակցում են 33 երկրների ներկայացուցիչներ: Զգալի էր, որ միայն այսօր բավական մեծ ծախս էր կատարված. շքեղ զարդարված էր բեմը, թեև մեզ չհաջողվեց ստույգ ճշտել, թե քանի միլիոն է ծախսված բեմի ձևավորման համար, սակայն ըստ որոշ տեղեկությունների՝ մոտավորապես 1,5-2 միլիոն դրամի էր:
Միջոցառումը զերծ էր երկար ճառերից, «Վերածնունդ»-ը հանդիսատեսին ներկայացավ մոտ 3 ժամյա համերգային ծրագրով, որի բեմադրիչը Գյումրու Վարդան Աճեմյանի անվան դրամատիկական թատրոնի գլխավոր ռեժիսոր Լյուդվիգ Հարությունյանն էր: Միջոցառումը վարելու համար Գյումրի էին հրավիրել Խորեն Լևոնյանին և Գայանե Ասլամազյանին: Շիրակի թեմի առաջնորդ Միքայել եպիսկոպոս Աջապահյանի միջոցով Կաթողիկոսի օրհնությունը փոխանցելուց հետո, Շիրակի մարզպետ Ֆելիքս Ցոլակյանը ազդարարեց փառատոնի բացումը: Նշենք, որ պարոն Ցոլակյանը Շիրակի մարզպետարանի հուշամեդալով պարգևատրեց Սերժ Սարգսյանի եղբորը` Լևոն Սարգսյանին, որը փառատոնի համանախագահն է, «Փյունիկ» համահայկական հիմնադրամի հոգաբարձուների խորհրդի նախագահը: Պարզվում է, Լևոն Սարգսյանը պարգևատրվում էր «Հայաստանի հանրապետության կրթության, մշակույթի, սոցիալական ապահովության և առողջապահության ոլորտներում ծավալած ազգօգուտ և բեղմնավոր գործունեության համար»: Նմանապես նույն գործունեության համար պարգևատրվեց ազգային բարերար Գաբրիել Չեմբերջյանը: Ու որպեսզի այս ամենը շահարկման թեմա չդառնա, Շիրակի մարզպետը հարկ համարեց լրացուցիչ պարզաբանում տալ, թե ինչու իր մեդալը հանձնեց հատկապես այս երկու անձնավորություններին:
«Վերածնունդ» փառատոնը դուրս է եկել Գյումրիի սահմաններից, ամբողջ հանրապետությունով է անցկացվում և մեծ նշանակություն, դեր ունի երաժշտական արվեստի զարգացման և մեր երիտասարդների կրթման, երաժշտական դաստիարակության հարցում: Հարցը նրանում է, որ այս երկու անձնավորությունները միշտ շահագրգիռ են, որ փառատոնը միշտ անցկացվի Գյումրիում, ես կուզենայի, որ նրանք միշտ Գյումրիում անցկացնեն»,- ասաց մարզպետը:
Նշենք, որ փառատոնին մասնակցում էր ՀՀ մշակույթի նախարարի պաշտոնակատար Հասմիկ Պողոսյանը, որը նստել էր Գյումրու քաղաքապետի ու փոխքաղաքապետի կողքին` վերևի օթյակներից մեկում: Այս անգամ նրա կողքին չէր ՀՀ առաջին տիկին Ռիտա Սարգսյանը, թեև փառատոնը բացելուն պես` չմոռացան հնչեցնել նաև նրա անունը` որպես հովանավորի:
Նունե ԱՐԵՎՇԱՏՅԱՆ
