ՀՀ մշակույթի նախարարությունը, Ալ. Սպենդիարյանի անվան օպերայի և բալետի ազգային ակադեմիական թատրոնը և թատրոնի աջակցման հիմնադրամը երեխաների պաշտպանության միջազգային օրվան նվիրված բարեգործական համերգաշար են կազմակերպում:
«Հեքիաթն է կանչում» խորագրով բարեգործական համերգաշարի ողջ հասույթն ուղղվելու է մանկատներին, ինչպես նաև հաշմանդամ և սոցիալապես անապահով երեխաներին:
Այս մասին այսօր լրագրողների հետ հանդիպման ժամանակ ասաց Ալ.Սպենդիարյանի անվան օպերայի և բալետի ազգային-ակադեմիական թատրոնի փոխտնօրեն Հրաչ Գրիգորյանը:
«Համերգաշարի նպատակներից մեկը նաև մեր մանուկներին Օպերային թատրոնի և արվեստի հետ կապելն է,- ասում է փոխտնօրենը:- Միշտ դժգոհություններ են լինում, թե մենք հանդիսատես չունենք, հեռացել ենք թատրոնից, արվեստից և այլն, ահա այս ձևով մենք ուզում ենք մատաղ սերնդին մոտեցնել թատրոնին, որպեսզի հետագայում դժգոհություններ չառաջանան հանդիսատեսի հետ կապված»:
Կարդացեք նաև
Բացի այդ, նա ճիշտ չի համարում, որ գրեթե բոլոր միջոցառումները կենտրոնացած են մայրաքաղաքում. «Չենք ուզում մարզերը տարանջատել մայրաքաղաքից,- ասում է Հ. Գրիգորյանը,- և որոշեցինք, որ այն, ինչ պատրաստվում ենք ներկայացնել հունիսի 3-ին Երևանում՝ Օպերային թատրոնում, նույնը ներկայացնել նաև Գյումրիում (հունիսի 1-ին) և Վանաձորում (հունիսի 2-ին)»:
Համերգաշարի ռեժիսոր Դավիթ Հարությունյանն էլ համոզված է, որ տարեկան գոնե մեկ անգամ մարզերի երեխաները լավ երաժշտություն լսելու, լավ ներկայացում դիտելու հնարավորություն պիտի ունենան. «Դա շատ կարևոր է երեխաների համար,- նկատեց ռեժիսորը,- որովհետև նրանք դեռ ձևավորման շրջանում են, և պետք է այնպես անել, որ գեղեցիկի հանդեպ նրանց ընկալումները չփչանան»:
Դ. Հարությունյանի խոսքով՝ համերգին կմասնակցեն ոչ միայն Օպերային թատրոնի նվագախումբը, մեներգիչներն ու երգչախումբը, այլև հանրապետության էստրադային, ջազային երգիչները, մանկական երգչախմբերը, Տիկնիկային թատրոնի և Մայիլյան թատրոնի դերասանները և ուրիշներ:
«Կհնչեն նաև հայ կոմպոզիտորների հայտնի մանկական երգերն ու մեղեդիները՝ մշակված սիմֆոնիկ նվագախմբի և երգչախմբի համար: Կլինեն հայրենական արտադրության հայտնի մուլտֆիլմերի երգեր, որոնք կկատարվեն սիմֆոնիկ նվագախմբի, մանկական երգչախմբի, ինչպես նաև մենակատարների կողմից: Համերգը կեզրափակվի հատուկ այս ծրագրի համար կոմպոզիտոր Արտակ Հակոբյանի գրած «Խաղաղություն երեխաներին» երգով: Մի խոսքով՝ ծրագիրը բավականին հագեցած է, երեխաները հազիվ թե ձանձրանան»,- նշեց Դ. Հարությունյանը:
Նա հույս հայտնեց, որ ծրագիրը շարունակական բնույթ կկրի, և մանկատները մշտապես նաև իրենց ուշադրության կենտրոնում կլինեն. «Մենք գիտենք, որ պետությունն իր ուշադրության կենտրոնում է պահում մանկատներին, բայց ինչ-որ բանի պակաս միշտ էլ լինում է, և մենք որոշել ենք այդ պակասը լրացնել»,- ասաց համերգաշարի ռեժիսորը:
Սիրանուշ ՀԱՅՐԱՊԵՏՅԱՆ
