Ֆեյսբուքյան գրառման պատճառով դերասանին դատի է տվել ողնաշարաբանը

Վլադիմիր Ավագյանի անվան բուժհաստատության լազերային վիրաբուժության բաժնի վարիչ, օրթոպեդ-ողնաշարաբան Ենոք Աբրահամյանը դատի է տվել դերասան Աշոտ Մելոյանին (լուսանկարում):

Շենգավիթ վարչական շրջանի ընդհանուր իրավասության դատարանի դատավոր Արայիկ Կուբանյանի վարույթում է գտնվում նշյալ՝ պատվի եւ արժանապատվության հայցը: Նախնական դատական նիստը նշանակվել է հուլիսի 4-ին:

Հայցվոր ողնաշարաբանը հայցադիմումում նշում է, որ դերասանը մարտի 31-ին, իր ֆեյսբուքյան էջում տեղադրել է իր լուսանկարը, «վիրավորել ու զրպարտել» իրեն:
Դերասանն իր «Բժշկի » դեմքը, ում սխալ դիագնոզի պատճառով եւ սխալ բուժման արդյունքում մայրս մահացավ» վերտառությամբ «ստատուսում» գրել էր, որ առկա է եղել քրեական գործ, որ պատրաստ է ցույց տալ 1200 էջից բաղկացած քրեական գործը, որը քննիչները 4 անգամ կարճել են.«Սակայն, ֆաշիստը , ոչ մի անգամ ներողություն չխնդրեց ոչ իմ մայրիկից, ոչ ինձանից, եւ ոչ էլ մեր ընտանիքից»:

Ի դեպ, 2011թ. փետրվար 10-ի ոստիկանության Կենտրոնականի քննչական բաժնի կողմից կայացվել է որոշում քրեական գործի վարույթը կարճելու մասին:

Բժիշկը պահանջում է վիրավորանք հասցնելու համար պարտավորեցնել Ա.Մելոյանին համացանցով ներողություն խնդրել, հօգուտ իրեն բռնագանձել 1 միլիոն դրամ գումար, իսկ զրպարտության համար էլ՝ 2 միլիոն դրամ գումար:

Ռուզան ՄԻՆԱՍՅԱՆ

Լուսանկարը՝ Աշոտ Մելոյանի ֆեյսբուքյան էջից