Քիչ առաջ կարկուտ է տեղացել Շիրակի մարզում, որը վնասել է Արթիկի ու Ախուրյանի տարածաշրջանի թվով 12 գյուղեր: Ղարիբջանյան համայնքի բնակչները փակել են Գյումրի-Արմավիր ճանապարհը, այսպիսով իրենց բողոքի ձայնը բարձրացնելով ու պահանջելով խնդիրը լուծել: Նրանց պահանջով կարկտահարված տեղանք է հասել Շիրակի մարզպետ Ֆելիքս Ցոլակյանը, Շիրակի մարզի ոստիկանապետ, գնդապետ Վարդան Նադարյանն ու նրա տեղակալը, ինչպես նաև ոստիկանության այլ աշխատակիցներ:
Aravot.am-ի հետ զրույցում Շիրակի մարզպետարանի գյուղվարչության պետ Մովսես Մանուկյանն ասաց, որ կարկտից ավելի շատ տուժել է Ախուրիկը, Ղարիբջանյանը Ախուրիկի չափ վնաս չի կրել, այստեղ առաջին անգամն է ուժեղ կարկտահարությունը , հիմնականում ծաղկակաղամբ, կաղամբ ու լոբի են ցանել, որը և վնասվել է: Առայժմ, ըստ պաշտոնյայի, չի հաջողվում մտնել ցանքատարածքներ, քանի որ կարկտից հետո ահավոր վիճակ է :
Իսկ Ախուրիկում տեղացած կարկտի մասին մարզպետարանի պաշտոնյան ասաց, որ կարկուտի ամեն մի հատիկը հավկիթի չափ է եղել: Մեր այն հարցին էլ`մի ՞թե չկան հակակարկտային կայաններ, գյուղավարչության պետն ասաց. «Կա, բայց կարկուտն այնքան խոշոր է եղել, որ չի կարողացել քայքայել»: Շիրակի մարզպետին ու ոստիկանապետին հաջողվել է համոզել գյուղացիներին` բացել փակված ճանապարհը: Շիրակի մարզպետը գյուղացիներին խոստացել է վաղը հանձնաժողով ուղարկել, որպեսզի ճշտեն վնասի չափերը: Ի դեպ, գյուղացիները հակակարկտային կայանը գործարկողի հետ այսպես ասած կրակել-չկրակելու կռիվ են մղել: Նրանց ասելով, հակակարկտային կայանը անցած տարի աշխատեցրել են իրենց համագյուղացիները, իսկ այժմ միասնական համակարգով է աշխատում:Գյուղացիներից ոմանք հակակարկտային կայանի աշխատակցին մեղադրել են ուշ կրակելու մեջ ու վիճաբանություն է ծավալվել վերջիններիս մեջ, վերջինս իր հերթին արդարացել է:
Կարդացեք նաև
Ինչևէ, գյուղացիներին անչափ մտահոգում է այն փաստը, որ վարկեր են վերցրել բանկերից ու դեռ շիթիլը չտնկած. ստիպված են խոշոր պարտքերի ու վարկերի մեջ հայտնվել:
Նունե ԱՐԵՎՇԱՏՅԱՆ
