Հուլիսի 21-ից պաշտոնը ստանձնած Գորիսի քաղաքապետ Վաչագան Ադունցն արդեն առաջին խորհրդակցությունն է անցկացրել Գորիսի քաղաքապետարանի եւ քաղաքապետարանի ենթակայությամբ գործող հիմնարկ-ձեռնարկությունների աշխատակիցների հետ: Խորհրդակցության ժամանակ քաղաքապետը ներկաներին հանձնարարել է գրավոր ներկայացնել առաջիկա 6 ամսվա համար նախատեսված ծրագրերը, տեղեկացնել իրականացվող ծրագրերի ընթացքի մասին, հանդես գալ առաջարկներով եւ ներկայացնել մտահոգող խնդիրների ցանկը:
Ինչպես փոխանցեց Վաչագան Ադունցը` նա նաեւ նոր հանդիպումներ է նախատեսում ունենալ Գորիսում` նպատակ ունենալով ընդհանուր աշխատանքային մթնոլորտի եւ համագործակցային դաշտի ձեւավորման հիմքերը դնել:
«Պլանավորել եմ հանդիպել ավագանու հետ, երբ ինձ ներկայացրեցին որպես քաղաքապետ` ավագանու անդամները ներկա չէին, դա ես ճիշտ չեմ համարել: Առաջիկայում կհանդիպեմ Գորիսում գործող հասարակական կազմակերպությունների եւ լրատվամիջոցների ներկայացուցիչների հետ, նաեւ ծրագրում եմ ազգաբնակչության հետ ինտենսիվ շփումներ ունենալ: Պատասխանատուների, ավագանու անդամների հետ տեղում կծանոթանամ խնդիրներին, որպեսզի առաջիկայում ավագանու նիստ հրավիրենք եւ քննարկենք հուզող խնդիրների լուծման համար ֆինանսական հնարավորությունները ճիշտ ու նպատակային օգտագործման հարցը: Նպատակ ունեմ ընդհանուր կառավարման մոդելը ձեւավորել», – նշեց Գորիսի քաղաքապետը:
Իսկ մեր այն հարցին, թե նախկին քաղաքապետ Նելսոն Ոսկանյանի կառավարման մոդելից գո՞հ չէ, որ մտադիր է նոր մոդել ձեւավորել եւ ինչպիսի՞ն կլինի կառավարման իր մոդելը, պարոն Ադունցը պատասխանեց, որ ինչպես խոստացել է` հնարավորինս թափանցիկ գործունեություն է իրականացնելու:
Կարդացեք նաև
«Ես չգիտեմ նախկին քաղաքապետը ինչպես է համագործակցել նրանց հետ, թերեւս մի պահ, որ ավագանին մեզ մոտ ձախողվել է ու ավագանու նիստը չի կայացել , փոփոխված բյուջեն չի հաստատվել, դա նշանակում է, որ որեւէ խնդիր կա: Ես հնարավորինս բաց եմ աշխատելու, խորհրդակցության արդյունքում որոշում կայացնելն ավելի պաշտպանված կլինի սխալներից»,- փոխանցեց Գորիսի նոր քաղաքապետը:
Հիշեցնենք, որ հուլիսի 8-ին Գորիսում կայացած համայնքի ղեկավարի ընտրության արդյունքում` անկուսակցական Հրայր Յոլյանից առավել քվեներ հավքելով, ՀՀԿ-ական Վաչագան Ադունցն ընտրվել է Գորիսի քաղաքապետ եւ հուլիսի 21-ից ստանձնել իր պաշտոնը: Իսկ մինչ այդ` 14 տարի շարունակ Գորիսը ղեկավարել է ՀՀԿ-ական Նելսոն Ոսկանյանը:
Մերի ՍՈՂՈՄՈՆՅԱՆ
