«Ռուզան Գորգիսյանը պիտի իմ ասածները կարդար: Համաձայնեցնելով ընտանիքի անդամների հետ. այդպիսի կոչ է արված կառավարությանը, այն, ինչ իրենք էինք մտածում ու պահանջում, ես վաղուց պահանջել եմ»,-Aravot.am-ի հարցին` մինչ կառավարությանը` Ծիծեռնակաբերդից ազգային հերոս Մովսես Գորգիսյանի աճյունը Պանթեոն տեղափոխելու առաջարկությամբ դիմելը, ճիշտ չէ՞ր լինի հարցը քննարկել Մովսես Գորգիսյանի ընտանիքի անդամների հետ, այսպես արձագանքեց ԱԻՄ առաջնորդ Պարույր Հայրիկյանը:
Հիշեցնենք, որ Մովսես Գորգիսյանի այրին վրդովվել էր, թե ինչո՞ւ Հայրիկյանը հաշվի չի առել իրենց ընտանիքի կարծիքը: Այնուհետև Պարույր Հայրիկյանը նշեց. «Կարևոր է, որ ոչ Ռուզանը, ոչ էլ որևէ մեկը գլուխը չպիտի կորցնեն: Եթե կողմ ես, որ Եղեռնի հուշարձանը լինի Եղեռնի հուշարձան, եթե կողմ ես, որ ամուսնուդ շիրիմը տեղափոխվի, էլ Հայրիկյանի ո՞ր ասածին ես դեմ, որ քեզ հետ հատուկ չի՞ խոսել: Ինչո՞ւ պիտի իր հետ խոսեմ, ես խոսում եմ եղեռնի հուշարձանի մասին: Եվ կառավարությանն ասել եմ, որ խորհրդակցի հարազատների հետ. նա, ով գործ պիտի անի, նա էլ թող խոսի հարազատների հետ: Էդ էր մնացել պակաս`ես եղեռնի հուշարձանի հետ կապված հարցը, մեր ազգի ռազմավարական խնդիրները պիտի համաձայնեցնեի նույնիսկ իմ ամենահարազատ մարդու հետ: ԱԻՄ-ում այդ հարցը քննարկել ենք, ուղերձը ուղղել, Ռուզանը`որպես նախկին ԱԻՄ-կան, թող ասեր, որ երբ այդ որոշումը ընդունել եք, ինչ-ինչ բաներ նկատի ունենաք: Բայց նամակում գրված է, որ համաձայնեցնելով ընտանիքի անդամների հետ այդ տեղափոխությունը կատարել արարողակարգով»:
Ռուզան Գորգիսյանը նաև կարծիք էր հայտնել, թե Հայրիկյանը նման հայտարարություններ է անում Ռուսաստանին հաճոյանալու համար: ԱԻՄ առաջնորդն արձագանքեց. «Լավ էլի: Որևէ բանական մարդ չի կարող կողմ չլինել այդ առաջարկին: Կառավարությունը դրական է արձագանքել այդ նախաձեռնությանը: Իսկ թե երբ կյանքի կկոչի, դա կերևա: Բայց վատ գործերն իրենք շատ արագ են անում` Մաքսայինի համար իրենց պատռեցին, բայց հիմնը բարեփոխելու, դասական ուղղագրության հարցում հապաղում են, Եվրոպական միության հարցում երեքուկես տարի ձգձգեցին, հետո ձախողեցին»:
Տաթև ՀԱՐՈՒԹՅՈՒՆՅԱՆ
Կարդացեք նաև
