Կանազի կլինիկական հիվանդանոցի հոգեբուժական բաժանմունքի ռազմական բժիշկներին ծեծի ենթարկելու եւ հիվանդանոցից փախուստի դիմելու համար մեղադրվող ժամկետային զինծառայողների գործով դատական նիստին այսօր հարցաքննվեց նաեւ դեպքի ականատես Սերգեյ Մարությանը: Դեպքի օրը նա նույնպես հոսպիտալում բուժում էր ստանում:
Նրա պատմելով, երբ ինքը նկատել է խառնաշփոթը, վախեցել է, փախել. «Տեսել եմ շուխուռ ա, փախել եմ: Հոսպիտալի պետի գոռոցն եմ լսել ու վերջ: Հետո ասեցին ռազմական ոստիկանությունից մարդ կա, վախեցա, փախա, դեղերի տակ էի: Հետո էլ բան չեմ տեսել, քնած եմ եղել»:
Նրա խոսքով, քննիչն է իր տեղը ցուցմունք գրել. «Էսքանը պատմել եմ, քննիչը գրել ա ու ասել տակը խազի գնա: Հետո քննիչին ասել եմ, որ քնած եմ եղել, ինձ ավելորդ հարցեր չտաս: Ես գրել, կարդալ չգիտեմ: Ինչ ուզում են, թող անեն»:
Հետո էլ ասաց, որ ինքը չի իմացել` ինչու են իրեն հարցաքննում, մտածել է, թե իր ծառայության ազատման համար է կանչվել ոստիկանություն:
Մեղադրողը միջնորդեց հրապարակել վկայի նախաքննական ցուցմունքը:
Հրապարակվեց վկայի նախաքննական ցուցմունքը, որտեղ վկան պատմել էր, որ «ստոպ պալատ» (այդպես էր կոչվում մեղադրյալների հիվանդասենյակը) տարվող օղու շիշը, ինչը տեսել է նաև բուժաշխատողներից մեկը: Նախաքննական ցուցմունքում Մարությանը նաեւ պատմել էր, որ տեսել է ապակիները ջարդված.«Խառը ջարդում էին: Տեսել եմ, որ «ստոպ սենյակում» կռիվ ա գնում»:
Դատաքննության ժամանակ նա հրաժարվեց իր ցուցմունքից, ասաց, որ այնտեղ ամեն ինչ սխալ է ու իրականությանը չի համապատասխանում:
Արփինե ՍԻՄՈՆՅԱՆ
