Սեպտեմբերի 5-ին Քաջարանից Կապանի բժշկական կենտրոն տեղափոխված 2 հիվանդի անալիզի արդյունքներն արդեն պարզ են: «Նախնական տվյալներով` այդ 2 հիվանդի անալիզի արդյունքները մաքուր են, նրանց մոտ աղիքային լուրջ վարակիչ հիվանդություն չի հայտնաբերվել: Բայց ապահովության համար նրանց դուրս չենք գրում, նրանք շարունակում են մեզ մոտ համապատասխան բուժում ստանալ», – «Առավոտին» փոխանցեց Կապանի բժշկական կենտրոնի ինֆեկցիոն բաժանմունքի վարիչի ժամանակավոր պաշտոնակատար Մարինե Քոչարյանը: Բժշկուհին բավարար է գնահատում նաեւ հիվանդանոցում գտնվող մյուս 9 հիվանդի առողջական վիճակը: «Հիվանդները Կապանից են եւ Քաջարանից, տարբեր ընտանիքներից: Կապող ինչ-որ օղակ չկա, եթե լուրջ բան լիներ, ապա ընտանիքի մյուս անդամների մոտ էլ նույն խնդիրը կլիներ, բայց հիմնականում ընտանիքներից միայն մի անդամն է վատ զգացել ու փորլուծության, ջերմության, մկանացավերի գանգատներով հիվանդանոց եկել, ընդհանուր օղակ չենք տեսնում», – հավելեց բժշկուհի Քոչարյանը:
Ինչպես ավելի վաղ տեղեկացրել էինք` սեպտեմբերի 5-ից մինչ սեպտեմբերի 9-ը սրտխառնոցով, գլխացավով, մկանացավերով, փորլուծության եւ ջերմության գանգատներով Կապանի հիվանդանոց են տեղափոխվել Քաջարան քաղաքի 8 բնակիչ եւ 3 բնակիչ էլ` Կապան քաղաքից:
Մերի ՍՈՂՈՄՈՆՅԱՆ
