Այսօր Վերաքննիչ քրեական դատարանը քննում է ազատամարտիկ Վոլոդյա Ավետիսյանի գործով Կենտրոն եւ Նորք Մարաշ վարչական շրջանների ընդհանուր իրավասության դատարանի որոշումը:
Մինչեւ դատական նիստի սկսվելը մի խումբ ազատամարտիկներ դատարանի բակում ի պաշտպանություն իրենց մարտական ընկերոջ հայտարարություն ներկայացրին:
Ազատամարտիկ Գագիկ Սարուխանյանը կրկին շինծու գործ որակեց Վոլոդյա Ավետիսյանի նկատմամբ հարուցված գործը:
«6 տարի դատապարտել են ոչ մի բան անելու համար: Այս իշխանությունները, ի վիճակի չլինելով իրենց դեմքը պահել, արդեն թքած ունեն, թե իրենց մասին ինչ կխոսեն թե՛ աշխարհում, թե՛ Հայաստանում: Դիմում են ցանկացած տիպի ուժային մեթոդների»,- ասաց պարոն Սարուխանյանը:
Կարդացեք նաև
Հետո անդրադարձավ վերջերս մահացած ազատամարտիկ Գառնիկ Խչեյանին ու ասաց, որ հետմահու նրա նկատմամբ քրեական գործ է հարուցվել, Վոլոդյա Ավետիսյանի գործով դատական նիստի ժամանակ դատավորին պատասխանելու համար. «Փառավոր ազատամարտիկ, Վարդենիս ջոկատի հրամանատարը, Լեոնիդ Ազգալդյանի խմբից: Քրեական գործ են հարուցել զոհված ազատամարտիկի վրա, դրանից էն կողմ լկտիություն չկա: Սա մեզ վախեցնելու համար են անում: Այսօր տեղեկացա, որ մեր ազատամարտիկներից մի քանիսի տներն արդեն ոստիկաններն այցելել են, առաջարկել են չմասնակցել այս ակցիաներին, թե չէ ձեր վրա էլ քրեական գործեր կհարուցվեն: Մի քանի տվյալներ կան, որոնց վերաբերյալ դեռ փաստահավաք պետք է անենք»:
Հետո կրկին վերադառնալով Վոլոդյա Ավետիսյանին, ասաց, որ Վոլոդյա Ավետիսյանի բռնած գործն այնքան հուժկու ու ճշմարիտ էր, որ իշխանությունները շատ վախեցան. «Ու դիմեցին նմանատիպ քայլերի: Մեզ վախեցնելն անհնար է, վախեցողներն արդեն վախեցել, գնացել են, մեզ անհնար է կանգնեցնել: Եթե ուզում եք մեզ՝ բոլորիս, կանգնեցնել, ստիպված եք լինելու բոլորիս գցել բերդերը: Դուք չունեք այդքան բերդ, բայց բոլորս ենք բերդում՝ Հայաստան քրեակատարողական հիմնարկի բնակիչներ ենք: Հայաստանը դարձել է մեծ բերդ բոլոր խելոք չպահողների համար:
Մի քանի ընտանիք միլիարդներ են դիզում, միլիոնները կրվում կազինոներում, իսկ խեղճ ու կրակ ժողովրդին ասում են, գնացեք ձեզ համար տաքսի քշեք, լավ տղա եք, ընտանիք պահեք»:
Դատարան մտնելով ազատամարտիկները վանկարկեցին «Ազատություն Վոլոդյային, ոչ դատաստանին»:
Դատաքննությունը սկսվել է:
Արփինե ՍԻՄՈՆՅԱՆ
