«Այո՛, այս գագաթնաժողովը, ըստ էության, ՆԱՏՕ-ի ռազմավարության մեջ փոփոխություն մտցրեց»,- այսօր՝ սեպտեմբերի 17, «ՆԱՏՕ-ի գագաթնաժողովի ազդեցությունը Հայաստանի եւ Հարավային Կովկասի վրա» քննարկման ընթացքում հայտարարեց Տարածաշրջանների հետազոտությունների կենտրոնի ավագ փորձագետ Դավիթ Շահնազարյանը:
Նա, վերլուծելով գագաթնաժողովի արդյունքները նշեց, որ Ամերիկայի Միացյալ Նահանգները, անվտանգության ապահովման առումով, վերադառնում է Եվրոպա եւ Բալթյան տարածաշրջան: Դրա վառ օրինակ նա համարում է ՆԱՏՕ-ի գագաթնաժողովի նախօրեին Օբամայի այցը Էստոնիա: Հիմնական խնդիրներից մեկը պարոն Շահնազարյանը համարում է Ռուսաստանի նոր քաղաքականությունը, որն ուղղված է վերանայելու եվրոպական գոյություն ունեցող անվտանգության համակարգը եւ վերադարձ դեպի խորհրդային միության փլզման արդյունքները կասկածի տակ դնելու վիճակը:
Նրա խոսքերով՝ կա ՆԱՏՕ-ի անդամ երկրների 2 խումբ՝ անվտանգություն ապահովողներ եւ անվտանգություն սպառողներ. «Առաջին խմբի շատ ցայտուն օրինակն էր Մեծ Բրիտանիայի նախաձեռնությունը, որով ստեղծում է նոր կառույցներ ՆԱՏՕ-ի ներսում, որը ես կասեի՝ ՆԱՏՕ-ի ներսում, որը հստակ հասկանում է Ռուսաստանի նոր քաղաքականության վտանգը եւ պատրաստ է ամենալուրջ քայլերի այդ վտանգը չեզոքացնելու համար»:
Անդրադառնալով պատժամիջոցներին ուղղված Ռուսաստանի տնտեսությանը
Դավիթ Շահնազարյանը նշեց, որ այդ պատժամիջոցները հարված են հասցնում Ռուսաստանի տնտեսությանը, սակայն դրանք Կրեմլին չեն ստիպում փոխել իր քաղաքականությունը: Փորձագետը գագաթնաժողովի գլխավոր արդյունք է համարում Վրաստանի հետ հատուկ հարաբերությունների ստեղծումը, քանի որ դա էապես մեծացնում է ՆԱՏՕ-ի դերակատարությունը տարածաշրջանում եւ նպաստելու է տարածաշրջանի կայունացմանը:
Կարդացեք նաև
«Գագաթնաժողովի ամենակարեւոր արդյունքն է, որ չհաջողվեց այն, ինչ խոստացել էր անել հարեւան երկրի՝ Թուրքիայի նախագահը, որ առանձին հարցով բացառապես տարածքային ամբողջականության սկզբունքի վրա պետք է որոշում ընդունվեր: Ես կարծում եմ, որ Հայաստանի մասնակցությունը բարձր մակարդակով նաեւ կանխեց այդ ամենը»,- հավելեց նա:
Ամի ՉԻՉԱԿՅԱՆ
