«Սա միանշանակ ապտակ էր հասարակությանը, սա ցինիզմի դրսևորման գագաթնակետն է»,-Aravot.am-ի հարցին ` Սուրիկ Խաչատրյանին` Սյունիքի մարզպետի պաշտոնում վերանշանակելը ապտա՞կ էր հասարակությանը, մանավանդ հասարակական ընդվզումը նրա դեմ ակնհայտ էր, այսպես արձագանքեց քաղաքացիական ակտիվիստ Գայանե Առուստամյանը:
Նա նշանակմանն այսպիսի գնահատական տվեց. «Այս իշխանություններն ակնհայտ մարդասպանին նշանակել են մարզպետ, և սա գալիս է ապացուցելու, որ այս իշխանություններն ուղղակի իրենց այդ դիրքորոշմամբ ճնշում են գործադրում հասարակության վրա և ուղերձ հղում, թե ձեզ կառավարելու է մարդասպանը, և եթե ձեզնից որևէ մեկը փորձի ընդվզել, կընկնի Բուդաղյանի օրը»:
Գայանե Առուստամյանի կարծիքով` հասարակության ոչ բոլոր շերտերն են ընդվզել. «Ես չէի ասի, որ մեր հասարակության բոլոր շերտերն են ընդվզել այդ նշանակման դեմ, քանի որ տեսանք, որ Սյունիքում ինչ-որ հանրույթ, շաղված կին, որը բանաստեղծություն էր արտասանում Լիսկային ձոնված, ինչ-որ մարդիկ, որոնք սեղմում էին նրա ձեռքերը և կենաց խմում: Զարմացա, որ նրա ոտքերի տակ ոչխար չեն մորթել, քանի որ դա էլ է ավանդույթ»:
Գայանե Առուստամյանի կարծիքով`«այս նշանակումը նույնիսկ ապտակ չէ, այլ ավելի ցինիկ դրսևորում ՀՀ հասարակությանն ուղղված»:
Կարդացեք նաև
Դիմելով սյունեցիներին` Գայանե Առուստամյանն ասաց, թե «պատմականորեն արժանապատվություն ունեցող ժողովուրդ եք, և ես զարմացած եմ, որ դուք չեք կանգնում և Լիսկային ուղղակի չեք քշում փայտերով ու քարերով իր այդ որջից»: Մեր դիտարկմանը, գուցե վախենո՞ւմ են, տիկին Առուստամյանն ասաց. «Մի վախեցեք, սյունեցիներ»:
Aravot.am-ը հիշեցրեց, թե Սուրիկ Խաչատրյանը նույնիսկ չսպասեց էլ, որ ՀՀ նախագահ Սերժ Սարգսյանը` ՀՀ Սահմանադրությանը համապատասխան վավերացնի իր վերանշանակումը ու անցավ գործառույթների իրականացմանը, Գայանե Առուստամյանն արձագանքեց. «Սուրիկ Խաչատրյանը ո՞վ է` Լիսկան, հա: Վստահ եմ, որ այս մարդը Սահմանադրությունից տեղեկություն չունի, և այս իշխանությունը ու նրա նշանակումները Սահմանադրությամբ և օրենքներով չեն առաջնորդվում, այլ ներքին մաֆիայի օրենքներով: Ակնհայտ է, որ ներքին կարգով ուղղակի ասվել է Լիսկային` գնա տեղդ, և նա գնացել է իր տեղը: Լիսկան անգամ հեռավոր պատկերացում չունի Սահմանադրության մասին, ի՞նչ է Սահմանադրությունը նրա համար, վստահ եմ` ոչինչ»:
Տաթև ՀԱՐՈՒԹՅՈՒՆՅԱՆ
