«Ես հասկանում եմ, որ ձեր քաղաքական թիմն այս նախագծին դեմ է եւ դեմ է քվեարկելու: Ես դա ընդունում եմ, դա շատ պարզ է: Այդպես էլ պիտի լիներ: Բայց գոնե մի փորձեք հերքել անհերքելին»,- այսօր ԱԺ-ում «Արտակարգ դրության իրավական ռեժիմի մասին» օրենքում փոփոխություններ կատարելու մասին ՀԱԿ-ի ներկայացրած օրինագծի քննարկման ժամանակ իր ամփոփիչ ելույթում ասաց Գագիկ Ջհանգիրյանը: Նա վստահեցրեց, որ այդ օրենքի մի շարք դրույթներ հակասում են Սահմանադրությանը:
Գագիկ Ջհանգիրյանը պատասխանեց ՀՀԿ խմբակցության պատգամավոր Խոսրով Հարությունյանի մի դիտարկմանը՝ օրենքի հետ կապված. «Ասում է, որ այստեղ գրված է, որ մեր Զինված ուժերը պետք է կիրառվեն այն դեպքում, երբ մնացածների ուժերը չեն բավարարում, երբ տեռորիստական խմբեր են գալիս: Բայց 2008-ին էլ չէին ասո՞ւմ, որ ընդդիմությունը զինված՝ ոստիկաններին ու զինծառայողներին գնդակահարում է: Բա ո՞ւր է, մի հատ զինված ընդդիմադիր դատեիք, մի անգամ պատասխանատվության կանչեիք»:
Հռիփսիմե ՋԵԲԵՋՅԱՆ
