Այսօր՝ նոյեմբերի 26-ին, Երեւանի պետաական համալսարանում կայացավ Արծրունի Սահակյանի «Հայ հին վիպական ավանդույթը և պատմագրությունը» թեմայով ատենախոսության պաշտպանությունը՝ բանասիրական գիտությունների դոկտորի աստիճանի հայցման համար՝ «Հայ դասական գրականություն» մասնագիտությամբ:
Թեման հաստատած կազմակերպությունը Մեսրոպ Մաշտոցի անվան Մատենադարան էր:
Պարոն Սահակյանը նշեց, որ երկրորդ դոկտորականն է ուզում պաշտպանել (նաեւ պատմական գիտությունների դոկտոր է), որովհետեւ թեման խնդրահարույց է, իսկ գիտության գործը շարունակողների թիվը գնալով պակասում է: ԵՊՀ Գրականագիտության 012 մասնագիտական խորհրդի նախագահ, բանասիրական գիտությունների դոկտոր Ժենյա Քալանթարյանը նշեց, որ Արծրունի Սահակյանի ատենախոսության թեման է «Հայ հին վիպական ավանդույթը և պատմագրությունը», մինչդեռ նա ծանրացել է Խորենացու վրա: Ըստ խորհրդի նախագահի, հայցորդի աշխատանքում Խորենացու արժանավորությունը , կարծես, պակասել է Մարաբ Մծուրնացու (ըստ Խորենացու՝ Մար Աբաս Կատինայի) դերակատարությունը կարեւորելու հաշվին: Հայցորդը չհամաձայնեց, փաստարկներ բերեց, որ ընդհակառակը՝ պատմահայրը հաճույքով օգնել ու փրկել է իր վարպետին: Կարծիք հնչեց, թե Խորենացու հանդեպ հայցորդի վերաբերմունքը վտանգավոր քաղաքական ու ազգային հետեւանքներով է հղի, ինչին Արծրունի Սահակյանը հումորով պատասխանեց:
Նրա ընդդիմախոսները, այդ թվում Ալբերտ Մուշեղյանն ու Վազգեն Սաֆարյանը, հայցորդի աշխատության որոշ դրույթների հետ չհամաձայնելով հանդերձ, այնուամենայնիվ եզրակացության մեջ նշել էին, որ Արծրունի Սահակյանն արժանի է բանասիրական գիտությունների դոկտորի աստիճանին:
Ատենախոսության այս պաշտպանությունը ռեկորդային էր նրանով, որ սկսվել էր 14:30-ին եւ ձգվել մինչեւ 20:05: Գիտական խորհրդի 16 անդամներից 15-ը կողմ քվեարկեց, 1-ը դեմ, ու արդյունքում Արծրունի Սահակյանին նաեւ շնորհվեց բանասիրության դոկտորի աստիճան: Ավելի վաղ մի քվեարկություն էլ էր եղել, 16 հոգանոց խորհրդի անդամներից մեկը տուն էր գնացել պաշտպանության կեսից, 7-ը կողմ էին քվեարկել, 5-ը դեմ, 3-ի քվեարկությունն էլ անվավեր էր ճանաչվել: Այդ արդյունքով հնարավոր չէր, որ հարցը հանգուցալուծում ստանար, քանի որ պետք է կողմ քվեարկեր անդամների 2/3-ը: Ստիպված եղան տանից հրավիրել 16-րդ անդամին՝ նոր քվեարկության համար:
Կարդացեք նաև
Հավելենք, որ պաշտպանությունից տպավորություն էր ստեղծվում, թե միտումնավոր է այս ձգձգումը, եւ խորհուրդը խնդիր ունի հայցորդի հետ: Կամ էլ Խորենացու հանդեպ ոչ ավանդական մոտեցնումն էր բոլորին անակնկալի բերել, ու երկրորդ անգամ գիտությունների դոկտորի աստիճանին հավակնելը:
Գոհար ՀԱԿՈԲՅԱՆ
Աձամբ ճանաչում եմ, և համոզված եմ, որ այս համատարած տգիտության միջավայրում նրա նման գիտնականի գոյությունը ուղղակի ծիածան է մութ երկնքում…
Արժանի է…
Շնորհավորում եմ…