Այսօր Գյումրու Վարդան Աճեմյանի անվան դրամատիկական թատրոնում «Էսկադա» պարի թատրոնի սաները Մոսկվայի պետական «Ռուսկիե սեզոնի» պարային համույթի հետ համատեղ համերգ-ներկայացում ցուցադրեցին՝ նվիրված «էսկադայի» 20-ամյակին: Ինչպես ավելի վաղ տեղեկացրել էինք, նրանց ուսանելու նպատակով Գյումրի էր ժամանել Մոսկվայի պետական «Ռուսկիե սեզոնի» գեղարվեստական ղեկավար և գլխավոր բալետմեյստեր Նիկոլայ Անդրոսովը: Համերգի ռեժիսոր Լյուդվիգ Հարությունյանը նշեց, որ այսօրվա համերգային ծրագիրը կրում է «Խաղաղություն աշխարհ»-ին խորագիրը, և երաժշտական ձևավորումը, ինչպես նաև պարերը ընտրությունը պատկանում է Նիկոլյա Անդրոսովին:
Նշենք, որ յուրաքանչյուր պար ուներ իր սյուժեն, և համերգ-ներկայացմանը հայերից բացի մասնակցում էին ռուսական զինվորականներն՝ իրենց ընտանիքներով: Շատերը նստելու տեղ անգամ չունեին, սակայն մինչև վերջ ոտքի վրա կանգնած դիտեցին: Համերգի պրոդյուսեր Տիգրան Վիրաբյանը նշեց, որ 1 տարի շարունակ պատրաստվել են այս համերգային ծրագրին, որպեսզի այն անցնի բարձր մակարդակով: Նիկոլայ Անդրոսովն էլ իր հերթին հայտնեց, որ «Էսկադայի» գեղարվեստական ղեկավար Դիանա Մացոյանից հրավեր ստանալուն պես մեծ սիրով համաձայնեց օգնելու «Էսկադային»: Նա անդրադարձավ նաև «Էսկադայի» սաների խղճուկ պայմանների, բետոնե հատակի վրա պարապմունքներ անցկացնելուն:
Այս թեմային կանդրադառնանք առաջիկայում:
Նունե ԱՐԵՎՇԱՏՅԱՆ
