Ծափեր եւ օվացիաներ չեն լինի։ Դեկտեմբերի 23-ին Հայաստանի ԵՏՄ-ացմամբ ավարտվել է նաեւ «համաժողովրդական շարժման» նախընթաց փուլը՝ ծափերի եւ օվացիաների ժամանակաշրջանը, երբ հրապարակներում խոսում էին իշխանությանը ներկայացված 12 կետերից։ Գագիկ Ծառուկյանը, առհասարակ, դեմ է բոլոր տեսակի ցնցումներին։ Նա շարժումը Երեւանից տեղափոխեց մարզեր եւ գյուղական շտաբներ։ Այսօր նա շարժումը հետ է բերում Երեւան, բայց դահլիճային ցիվիլ տարբերակով, որպեսզի չլինեն հայհոյանքներ, «Սերժիկ, հեռացիր» կոչեր եւ իշխանափոխության պահանջով չնախատեսված այլ բարձրաձայնումներ։ Կարելի է ասել՝ հունվարի 20-ին Հայաստանում սկսվելու է բոլորովին նոր մի բան, որի համար հարկ կլինի, որ Լեւոն Տեր-Պետրոսյանը քաղաքագիտական անվանում մտածի։ Այդ նոր իրարանցումը «հակաբարեփոխական» չես անվանի, դա կխրտնեցնի ժողովրդին։ Կարծում եմ՝ կարելի է հասարակական շարժումներից օրինակ
վերցնել։ Ասենք՝ «Սերժիկ, չես փոխի» կամ՝ «Չփոխենք, որ փոխենք»։ Մի քիչ շուտ է «Ծառուկյան, առաջ» կարգախոսի համար, թեեւ ով գիտի, թե իրենք երբ են մտածում իշխանափոխություն անել։ Առաջիկա փետրվար-մարտին Սերժ Սարգսյանն իր կարծիքն է հայտնելու բարեփոխումների հետագա ճակատագրի մասին։ Իսկ եթե Սերժ Սարգսյանը դարձյալ հետաձգի կամ, տեսնելով, որ սահմանադրական փոփոխությունների հարցով անհրաժեշտ կոնսոլիդացիա չկա, ընդհանրապես ձեռք քաշի բարեփոխումների գաղափարի՞ց։
Կարծես հասկացանք արդեն, թե ինչու է ԲՀԿ-ն համաժողովը հունվարին անում եւ ոչ թե փետրվարին կամ գարնան գլուխ։ Բայց մի ուրիշ բան էլ է կարծես պարզվում։ Հասկանալի է դառնում, որ ԲՀԿ-ն իշխանություններից ուրիշ պահանջ չունի, բացի սահմանադրությունն անփոփոխ թողնելը։ Սա
արդեն հետաքրքիր է։ Հետաքրքիր է այն առումով, որ այս նոր պայքարին, եթե եռյակը դեռ կենդանի է, պետք է ինտեգրվեն նաեւ ՀԱԿ-ն ու «Ժառանգությունը» եւ ԲՀԿ-ի հանգույն խելամիտ կեցվածք որդեգրեն իշխանությունների հանդեպ՝ իշխանափոխության գործը 100 տոկոսով Գագիկ Ծառուկյանին վստահած։
Կարդացեք նաև
Էդիկ ԱՆԴՐԵԱՍՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
