«Հայ գիրք» գրախանութն այսօր հերթական անգամ հանդիպատեղի էր դարձել գրողի ու ընթերցողի համար: Այս անգամ առիթը բանաստեղծ, լրագրող, երաժիշտ Արա Ալոյանի «Մի լուսացիր» և «Ոտնահետքեր ջրաներկով» բանաստեղծությունների ժողովածուների շնորհանդեսն էր:
«Միանգամից երկու գրքի հրատարակումը պայմանավորված է վերջին տարիների իմ առավել արգասաբեր գրական գործունեությամբ և գրական «արտադրանքի» առատությամբ,- ասում է բանաստեղծը.- չցանկացա բոլոր ստեղծագործությունները մեկ գրքով ներկայացնել, որովհետև «Ոտնահետքեր ջրաներկով»-ն իր աստվածախոսությամբ տարբերվում է: Ժողովածուն, մեծ հաշվով, կրոնական չէ, բայց հավատի զորեղացման տարրեր ու միտումներ ունի, իսկ «Մի լուսացիր»-ը, որ սիրո պատվիրանի պես է հնչում, ավելի շատ սիրերգություն է»:
Ա. Ալոյանն իր բանաստեղծությունների առաջին՝ «Լույս դառնալուց առաջ» (2003 թ.) ժողովածուն գրական թոթովանքների արտահայտություն է համարում, իսկ ահա հանրությանն այսօր ներկայացված երկու ժողովածուներն արդեն որոշակի գրական հասունություն են մատնանշում, որը բանաստեղծն ինքն էլ է զգում:
Aravot.am-ի հարցին, թե Ա. Ալոյանն ինչպիսին է պատկերացնում իր ընթերցողին, նա պատասխանեց. «Իմ ընթերցողը քնարականի հանդեպ հակում ունեցող մարդն է, հուզվող, հուզական, սիրառատ, «սրտից թույլ» մարդն է: Իմ ստեղծագործությունների դժգույն թանձրացումների՝ մահերգության, տառապանքի, հուսահատության մեջ էլ կա սիրո, դեպի լույսը գնալու հավատամքը»:
Կարդացեք նաև
«Պոեզիան գնալով հասունանում է Ալոյանի մեջ,- ասում է Հայաստանի գրողների միության Գեղարքունիքի մարզային բաժանմունքի նախագահ, գրականագետ Նորայր Ղազարյանը.- դա շատ հեշտ է նկատել նրա առաջին և վերջին ժողովածուները համեմատելիս: Ալոյանի պոեզիան, որն աչքի է ընկնում իր թարմությամբ, բնական զգացական ինքնատիպ դաշտ ունի: Նորաբնույթ են նրա բանաստեղծությունները. ձևի ու բովանդակության նոր որակ են բերում գրականություն: Ես միշտ ասել եմ նրան, որ երբ փորձում է մյուս մոդեռնիստների նման արտահայտվել, վնասում է իր բանաստեղծությունը: Նրա՝ ասելիքի և զգացմունքի միասնական դաշտ ապահովող բանաստեղծությունները դասականի ու նոր մտածողության միաձուլում են: Հենց դրանով է աչքի ընկնում Ա. Ալոյանի պոեզիան և դրանով է, որ միշտ թարմ է ու արդիական»:
Սիրանուշ ՀԱՅՐԱՊԵՏՅԱՆ
ԷՔՍՊՐՈՄՏ Արա Ալոյանի գրքի շնորհանդեսի առթիվ:
Ներկա լինեի
Մի թաս խմեինք
Քեզ հետ,Արա ջան
Համով,աննման:
Ծնունդը գրքիդ
Ուղղված է փառքիդ,
Դե մենք էլ քեզ հետ
Ուժ,աղեղ ու նետ…
Ն.Ա. 17.01.15.