«Նախագահի ելույթն առաջին քայլը չէր, որովհետեւ մինչեւ այդ եղել են իրադարձություններ, երբ ԲՀԿ-ն փորձում էր փոփոխության ենթարկել սեփական կշիռը»,- մարտի 5-ին «Հայելի» մամուլի ակումբում լրագրողների հետ հանդիպման ընթացքում ասաց քաղաքագետ Ալեքսանդր Մարկարովը:
Նրա կարծիքով՝ Սերժ Սարգսյանի ելույթը կատարված քայլերի արձագանք էր: Նա համարում է, որ ցանկությունը՝ հանդես գալ որպես այլ կշիռ ունեցող քաղաքական ուժ, միշտ պետք է հիմնավորված լինի. «Ներկայացված հիմնավորումը ժամանակի ստուգում չի անցել եւ համապատասխանորեն կար երկու սցենար՝ արդյոք ԲՀԿ-ն պատրաստ է եղել գնալ մինչեւ վերջ՝ փոխելով սեփական դիրքորոշումը քաղաքական դաշտում, եւ եթե պատրաստ էր, ի՞նչ քայլերի կդիմեր, եւ եթե պատրաստ չէր մենք տեսանք, թե ինչ տեղի ունեցավ»:
Քաղաքագետի խոսքերով՝ տեսականորեն սպասվում էր, որ ԲՀԿ կուսակցության անդամները կլքեն կուսակցությունը: Հարցին, թե արդյոք դա առնետավա՞զք չէր, նա պատասխանեց. «Ուզում եք, անվանեք առնետավազք, դա ձեր խնդիրն է, ես համարում եմ, որ մարդիկ կայացնում են իրենց համար ռացիոնալ որոշում, այսինքն՝ այն որոշումը, որն իրենց կարծիքով բխում է իրենց շահերից»:
Անդրադառնալով Գագիկ Ծառուկյանին՝ Ալեքսանդր Մարկարովն ասաց, որ կարելի է ենթադրել, որ ակտիվ քաղաքական դաշտից նա դուրս է գալու, սակայն հարց է մնում, թե ԲՀԿ-ն շարունակելո՞ւ է ստանալ այն ֆինանսական օժանդակությունը, որն մինչեւ այդ ստանում էր Ծառուկյանի ռեսուրսներից, թե՞՝ ոչ. «Եթե շարունակելու է ստանալ, ապա կուսակցությանը որոշ իմաստով հնարավորություն կտրվի մնալ քաղաքական ասպարեզում, բայց միանշանակորեն շատ ավելի փոքր ծավալով ներգրավվածություն է ունենալու, այդ թվում՝ նաեւ ԱԺ-ում եւ փոքր ազդեցություն է ունենալու քաղաքական գործընթացների վրա: Եթե ֆինանսական մասը դուրս է գալիս, ապա ԲՀԿ-ն կարող է վերածվել սովորական կուսակցության, քանի որ միայն մարդկային ռեսուրսը բավարար չէ, որ կուսակցությունը կարողանա իրականացնել իր գործառույթները, որոնք իրականացվում են քաղաքական դաշտում»:
Կարդացեք նաև
Ամի ՉԻՉԱԿՅԱՆ
