Aravot.am-ը այսօր «Դինամո» մարզադահլիճում զրուցեց նաեւ բռնցքամարտի Հայաստանի առաջնությանը հետեւող ԱԺ ՀՀԿ-ական պատգամավոր Սամվել Ֆարմանյանի հետ:
– Պարոն Ֆարմանյան: Դուք հիմա դիտում եք բռնցքամարտի հանրապետության առաջնությունը: Ձեզ հաճախ ենք տեսնում նաեւ մյուս մարզաձեւերի միջոցառումներում՝ շախմատ, ֆուտբոլ, ֆուտզալ, բայց ոչ թե որպես հանդիսատես, այլ գործող մարզիկ: Դուք Ազգային Ժողովի ամենամարզական պատգամավո՞րն եք:
– Ես սպորտ շատ եմ սիրում եւ դա իմ քաղաքական գործունեության հետ կապ չունի: Սպորտն ու ընթերցանությունը իմ սիրելի երկու հոբբիներն են: Ֆուտբոլը, կարելի է ասել, իմ կյանքի անբաժան ընկերն է: Շախմատ էլ շատ եմ սիրում: Իսկ բռնցքամարտի մրցման երկրորդ անգամ եմ ներկա: Շատ հետաքրքիր մարզաձեւ է, թեեւ կան տեսարաններ, որ եթե բռնցքամարտիկ չես, խորը ցավ ես ապրում՝ դաժան տեսարաններ են: Բայց դա էլ տղամարդու բնավորություն է ձեւավորում, դրված խնդիրը կարճ ժամանակում մինչեւ քրտինքի վերջին կաթիլը ներդնելով լուծելը, հաղթելը եւ հաղթանակի բերկրանքը վայելելը:
– Այսօր բռնցքամարտիկ կա՞ր, որին առանձնահատուկ էիք երկրպագում:
Կարդացեք նաև
– Շատ ուրախ եմ, որ Շիրակի մարզի իմ համերկրացիներից շատերը հաղթեցին: Բռնցքամարտը, ըմբշամարտը եւ ծանրամարտը մեծ ավանդույթներ են ունեցել Շիրակի մարզում: Ունեցել եմ համադասարանցիներ, ընկերներ, հարեւաններ եւ շատ ուրախ եմ, որ Շիրակի մարզը, չնայած բոլոր դժվարություններին, շարունակում է բարձր պահել Հայաստանի մարզական պատիվը:
Աշոտ ՀԱԿՈԲՅԱՆ
