Բնապահպան Սիլվա Ադամյանը մտահոգված է ծառերի էտման աշխատանքներից: Ըստ նրա՝ ծառերն այլանդակում են:
«Ինչ որ արվում է՝ շատ վատ է արվում, ճյուղերը պետք է կտրել, բայց լրիվ առողջ ծառեր են կտրվում, օրական բազմաթիվ ահազանգեր ենք ստանում: Երեւի պետք է քաղաքապետի մոտ հավաքվենք, խնդրի մասին խոսենք: Իմ կարծիքով, սա բիզնեսի հետ է կապված, հավաքում ու տանում են: Էտման անվան տակ ինչ-որ մեկի բիզնեսն են ծաղկացնում, փող աշխատում»,- այսօր «Պոստ սկրիպտում» ակումբում ասաց բնապահպանը:
Կենդանիների պաշտպան Կարինե Փանոսյանն էլ պատմեց, որ մի քանի օր առաջ ծառ էտողների հետ էր բանավիճում. «Իրենք համոզում էին, թե մի շաբաթից նայեք ոնց է ծաղկելու: Ոչ մի ձեւ չկարողացա հասկացնել նրանց, որ ծառերն այլանդակել են»:
Հետո խորհուրդ տվեց մաստակն ու այլ տիպի աղբը դրսում գետնին չգցել. «Մաստակը, պոլիէթիլենային տոպրակները, խցանները, պլաստմասե տարաներն ու այլ տիպի աղբեր կենդանիների համար մահացու սնունդ են: Մաստակը թռչունների համար կեր է, ուտում են ու սատկում»:
Կարդացեք նաև
Տիկին Ադամյանը շարունակեց, որ քաղաքը լուրջ խնդրի առջեւ է կանգնած. «Ամբողջ քաղաքը ագռավ ու կաչաղակ է ՝ ճիշտ աղբահանություն, կանաչապատում չիրականացնելու պատճառով: Բայց կանաչապատում ասելով միայն ծաղիկներ տնկելն են հասկանում, պետք է այգիներ ու կանաչ ունենանք, կանաչ ասելով նկատի ունեմ ծառ, ոչ թե խոտ: Այս քաղաքը պետք է ազատվի կաչաղակներից ու ագռավներից»:
Նրա տվյալներով, Հայաստանում 351 տեսակի թռչուն կա, որից 26-ը ընդգրկված է կարմիր ցուցակում, որոնք լուրջ վտանգի տակ են: Այս պահին լուրջ պահպանության կարիք ունեն տափաստանային հողմավար բազեն, գանգրափետուր հավալուսնը, մոխրագույն կռունկը, սեւ անգղը:
Բնապահպանը նաեւ պատմեց, որ վերջերս արագիլի 7 արհեստական բույն են տեղադրել Արմաշում, որ հաջորդ տարի այդ արհեստական բների վրա արագիլները բներ դնեն:
Արփինե ՍԻՄՈՆՅԱՆ
