Aravot.am-ը այսօր «Բլից ինֆո» մամուլի ակումբում հրավիրված մամուլի ասուլիսի ավարտին ՀՀ ազգային վիճակագրության մարդահամարի եւ ժողովրդագրության բաժնի պետ Կարինե Կույումջյանից հետաքրքրվեց, թե նրա բերած վիճակագրական տեղեկություններից կարելի՞ է ասել, որ մենք այսօր ծերացող ազգ ենք:
Ի պատասխան, Տիկին Կույումջյանը ասաց. «Նախորդ տարվա համեմատությամբ մահը հանրապետությունում նվազել է ու ոնց որ մենք դրա հաշվին այս տարվա առաջին եռամսյակի տվյալներով մնացինք անցած տարվա մակարդակի վրա: Երբ բնակչության թվաքանակում մեծահասակների մասնաբաժինը ավելանում է, դա ծնելիության նվազման պատճառ է:
Բայց այստեղ մի բան կա, որի վրա մենք երբեւէ ուշադրություն չենք դարձնում: Ճիշտ է, ծնունդները քչանում են, բայց նաեւ կյանքի սպասվող տեւողության ավելացում կա: Մարդիկ սկսել են ավելի երկար ապրել, դրա համար է մեր մեծահասակ բնակչության մասնաբաժինն ավելանում: Դրանից են ավելի շատ անհանգստանում, որովհետեւ սոցիալական՝ առողջապահություն, կենսաթոշակներ, նպաստներ, եւ հազար ու մի այլ խնդիրներ կան: Բայց եթե մարդկային գործոնի տեսակետից ես նայում, լավ է, որ մարդիկ ավելի երկար են ապրում»:
Աշոտ ՀԱԿՈԲՅԱՆ
