«Ավտոմատիկա» ընկերության արհմիության նախագահ Խաչիկ Մինասյանն այսօր «Առանց բեւեռացված հասարակության» պաստառով էր դուրս եկել մայիսմեկյան երթի:
Նա հիշեց, որ խորհրդային տարիներին աշխատավորների համար մայիսի 1-ն իսկական տոն էր, ոչ թե այսօրվա պես, երբ աշխատավորները տոնական տրամադրությունը մոռացած` դուրս են գալիս երթի հոգսերով. «Էն ժամանակ մայիսի 1-ը համերաշխության օր էր, շատերը նույնիսկ ստիպված էին երթի դուրս գալիս, որովհետեւ ինչ-որ տեղ ստիպողական էր:
Բայց ես միշտ հաճույքով եմ մասնակցել, որպես հանգստյան մի օր, երբ շքերթից հետո կարող էինք գնալ մի տեղ ու նշել այդ օրը: Իսկ հիմա տոնի խորհուրդ չէ, հիմա ավելի շատ միտինգի խորհուրդ է, որովհետեւ մեր երկրում աշխատելու հարցը շատ վատ է դրված: Չգիտես` ինչու մենք պետք է պայքարենք, որ ապահոված լինենք աշխատանքով»:
Նա դժգոհեց, որ տարիքային սահմանափակում կա աշխատանքի անցնելու հարցում. «25-30 տարեկան անձինք ինչ-որ տեղ կարող են աշխատանք գտնել, իսկ մեր տարիքի մարդիկ, որ հիսուն անց են, խնդիր է աշխատանք գտնելը»:
Մանրամասները` տեսանյութում
Արփինե ՍԻՄՈՆՅԱՆ
