Այսօր Շիրակի մարզի Վահրամաբերդ գյուղում Հայոց ցեղասպանության 100-ամյա տարելիցի կապակցությամբ տեղադրվեց խաչքար: Ամբողջ ապրիլ ամսվա ընթացքում Շիրակի մարզի գրեթե բոլոր տեղանքներում տեղադրվել են արձաններ, խաչքարեր, սակայն արտառոց էր Վահրամաբերդի խաչքարի տեղադրման վայրը: Այն տեղադրվեց ոչ թե գյուղի, այլ ձորի մեջ, այն ճանապարհին, որը մեծ թվով տուրիստների տանում է դեպի Վահրամաբերդի չքնաղ վանական համալիր՝ Մարմաշենի վանք:
Նշենք , որ վանքը կազմված է երկու շինությունից, գլխավոր՝ Կաթողիկե և կից փոքր եկեղեցիներից։ Գլխավոր եկեղեցին, ըստ արձանագրության, կառուցել է Վահրամ Պահլավունի հայրենասեր իշխանը 988–1029 թվականներին, երբ դեռ Անին Բագրատունիների ոստանն էր։
Վահրամաբերդի գյուղապետ Աղվան Մարտիրոսյանն ասաց, որ հուշաքարի տեղադրման հարցը 2-3 անգամ դրվել է ավագանու նիստի քննարկմանը, ավագանու անդամներից մի քանիսը ցանկություն են հայտնել, որ այն տեղադրվի գյուղի մեջ, որպեսզի կարողանան մաքուր պահել, հոգ տանել: Սակայն վերջնական հայտարարի են եկել տեղադրել ձորի մեջ, այնպիսի վայրում, որը տեսանելի կլինի տուրիստներին: Ըստ գյուղապետի, չնայած քարուքանդ ճանապարհներին՝ տարվա կտրվածքով Մարմաշեն վանքահամալիր այցելող տուրիստների թիվը հասնում է 15-20 հազարի:
Կարդացեք նաև
Նունե ԱՐԵՎՇԱՏՅԱՆ
