Մեկ տարի հետո դատարանում ցուցմունք տվեց պետեկամուտների կոմիտեի օպերատիվ-հետախուզական վարչության նախկին աշխատակից, ԵՊՀ դասախոս Արտակ Ղուկասյանը:
Շենգավիթ համայնքի ընդհանուր իրավասության դատարանում Ալեքսանդր Ազարյանի նախագահությամբ շարունակվող դատական նիստում խարդախության մեջ մեղադրվող Արտակ Ղուկասյանն ասաց, որ «համբերատար հետևում է, թե ինչպես են «տուժողների» մեծ մասը սուտ խոսում, վիրավորում են կամ վիրավորվում են իր կամ պաշտպանի կողմից տրված հարցերից, որոնց միջոցով իրենք փորձել են դատարանին ներկայացնել իրական պատկերն, ինչն, իր կարծիքով, նախաքննության ընթացքում թաքցվել է կամ խեղաթյուրվել»:
Նա ասաց, որ տուժողներն իրեն տոկոսով գումարներ են տվել, և եթե օրենքով պատասխանատվություն սահմանված չլիներ, նրանք կասեին, որ գումարներն իրեն տոկոսով են տվել, այլ ոչ թե կնշեին, թե «փայատեր» են:
Արտակ Ղուկասյանը ներկայացրեց, թե երբ է սկսել զբաղվել բիզնեսով, ինչպես է ծավալել իր գործունեությունը և հետագայում ինչպես են իրենից խլել բիզնեսը: Նա տեղեկացրեց, թե ինչպես են իրեն այլ մեքենայով տարել Եղվարդ՝ «զրուցելու»:
Կարդացեք նաև
Հետո սկսվել է հայհոյախառն զրույց, իրեն ծեծի են ենթարկել մոտ 10 հոգով: Նրա խոսքով՝ Եղվարդում է եղել նաև տուժող ճանաչված, ԱԺ պատգամավոր, հանրապետական կուսակցության անդամ Վահրամ Մկրտչյանը: Ամբաստանյալն ասաց, որ երբ իր հաշվապահը իրեն ծեծված վիճակում տեսել է՝ ուշաթափվել է:
Արտակ Ղուկասյանը նշեց, որ իր հորը ներկայացրել են, թե ինքը «պետական դաշտում» խնդիրներ ունի, ապահով ձեռքներում է, «ինչ ունեք, չունեք տվեք, որ տեսնենք՝ ոնց ենք Արտակի հարցերը լուծում». չասելով՝ «իրականում ինչի համար է, ես որտեղ եմ»: Ամբաստանյալի խոսքով՝ հորից խաբեությամբ վերցրել են ոսկեղենը, խոստացել, որ դրանք հետ են վերադարձնելու:
Նա չհասցրեց իր ցուցմունքն ավարտել:
Արտակ Ղուկասյանի պաշտպանությունն իրականացնում է ՀՀ փաստաբանների պալատի անդամ Հակոբ Ճարոյանը:
Հաջորդ դատական նիստը նշանակվեց մայիսի 12-ին:
Ռուզան ՄԻՆԱՍՅԱՆ
