Քաղաքացիական ակտիվիստ Դանիել Իոաննիսյանը չի հասկանում Բաղրամյան պողոտան ազատելու իմաստը:
«Որովհետեւ պահանջները չեն կատարվել: Ի՞նչ տարբերություն՝ ինչպես է մեր հաշվին ՀԷՑ-ը տարեկան ստանալու այդ 35- 36 միլիարդ դրամը: Դա կարտահայտվի էլեկտրաէներգիայի գնի բարձրացմա՞ն ձեւով, թե՞ այն հարկերի ձեւով, որ մուծում ենք բյուջե, որ բյուջեից գնա ՀԷՑ, ես իրոք տարբերություն չեմ տեսնում: Այն, որ այս հարցը մտավ օրակարգ, ուղղակի անհեթեթ էր: Այստեղի հավաքը խաղաղ հավաք է, սա համապատասխանում է թե՛ Սահմանադրության 29-րդ հոդվածի պահանջներին, թե՛ մարդու իրավունքների եվրոպական կոնվենցիայի 11-րդ հոդվածի պահանջներին: Ոստիկանությունն իրավունք չունի ուժ գործադրել: Սա պետք է գիտակցել ու չվախենալ ոստիկանությունից»,- Aravot.am-ին ասաց ակտիվիստը:
Նա երեկ հետեւել է նաեւ Ազատության հրապարակ տեղափոխված ցուցարարներին ու արձանագրել՝ մոտ հարյուր հոգի էին.«Մի քանի անգամ քիչ էին, քան այստեղ՝ Բաղրամյան պողոտայում կանգնածները: Երեկ Ազատության հրապարակում հետաքրքիր բաների ականատես եղանք: Նախորդ շաբաթ- կիրակի օրերին, երբ նստացույց էր, իշխանությունը փորձում էր հակազդել, լույսերն էին անջատում եւ այլն: Երեկ երեկոյան այնպիսի տպավորություն էր, որ իշխանությունները, հակառակը, քայլեր էին անում, որ Ազատության հրապարակում հավաքը տեղի ունենա, լուսավորությունն էին ապահովել եւ այլն, այնտեղ տեսանք նաեւ ՀՀԿ-ական շատ երիտասարդների»:
Մեր հարցին, այսինքն «Ոչ թալանին» նախաձեռնության անդամներին կասկածում եք իշխանությունների հետ գործարքի գնալու մե՞ջ, նա պատասխանեց. «ՀՀԿ-ականներն իրենց պայքարին միացել էին, բայց չեմ ասելու, որ ծախված են: Միգուցե անփորձ են, այստեղ պատասխանատվության հարց կա, միգուցե վախեցան պատասխանատվությունն իրենց վրա վերցնել: Եթե այստեղ ջարդ լիներ ու լինեին ժողովրդի գլխավերեւում, սա իրենց վրա պատասխանատվություն կդներ, դրա համար որոշեցին հրաժարվել»:
Կարդացեք նաև
Մանրամասները տեսանյութում:
Արփինե ՍԻՄՈՆՅԱՆ
