«Պատասխան՝ 100 տարի անց» խորագրով համալիր ծրագիրը, որն անդրադառնում է 1894-1923 թվականներին գրված, Հայոց ցեղասպանությունը փաստող անպատասխան նամակներին և այլ վկայություններին, մոտենում է ավարտին:
Այժմ ընթացքի մեջ են «Պատասխան՝ 100 տարի անց» պատկերագրքում ընդգրկվելիք նյութերի խմբագրման, թարգմանության և ձևավորման աշխատանքները:
Պատկերագիրքը բաղկացած կլինի 3 բաժիններից: Առաջինում կլինեն Հայոց ցեղասպանության զոհ դարձած մտավորականների վերջին նամակները և դրանց՝ մերօրյա անվանի հայ և օտարազգի գործիչների պատասխան-արձագանքները:
Երկրորդ բաժինը կամփոփի 100 տարվա ընթացքում հայ և օտարազգի գործիչների լավագույն անդրադարձները Հայոց ցեղասպանության փաստին: Այս բաժնում կլինեն նաև Հայոց ցեղասպանության հետևանքով որբացած հայ մանուկների հավաքական նամակին ի պատասխան՝ շարադրությունների մրցույթի լավագույն աշխատանքները:
Կարդացեք նաև
Երրորդ բաժինը կներկայացնի Հայոց ցեղասպանության վերաբերյալ տարբեր արխիվներից քաղված 10 վավերապատումներ և դրանց շուրջ գեղանկարի ու քանդակի մրցույթի լավագույն ստեղծագործությունները: Այս բաժնում կներառվեն նաև Հայոց ցեղասպանության տարիներին ոչնչացումից փրկված արվեստի նմուշներ:
Հիշեցնենք, որ «Պատասխան՝ 100 տարի անց» խորագրով՝ Հայոց ցեղասպանության վավերագրերի շուրջ գեղանկարչական, գրաֆիկական աշխատանքների և քանդակի մրցույթն իրականացնում են Ե. Չարենցի անվան գրականության և արվեստի թանգարանն ու Հայաստանի ազգային պատկերասրահը՝ ՀՀ մշակույթի նախարարության և ՎիվաՍել ՄՏՍ ընկերության աջակցությամբ։
Հայաստանի ազգային պատկերասրահի տնօրեն Արման Ծատուրյանը խոստանում է, որ Ազգային պատկերասրահը մշտապես բաց հարթակ կլինի երիտասարդության համար. «Ազգային պատկերասրահներն ակադեմիական և դասական կանոններով շարժվող կառույցներ են, բայց մենք ուղղվածությունը մի փոքր կփոխենք և հնարավորության սահմաններում կաջակցենք երիտասարդ արվեստագետներին, որպեսզի կարողանան արտահայտվել»:
Սիրանուշ ՀԱՅՐԱՊԵՏՅԱՆ
