«Երևանյան հեռանկարներ» 16-րդ միջազգային երաժշտական փառատոնի շրջանակներում սեպտեմբերի 3-ին Ալ. Սպենդիարյանի անվան օպերայի և բալետի ազգային ակադեմիական թատրոնում տեղի կունենա Իսրայելի ֆիլհարմոնիկ նվագախմբի համերգը՝ հնդիկ անվանի դիրիժոր Զուբին Մեթայի ղեկավարությամբ:
«Ինձ համար մեծ պատիվ է առաջին անգամ Հայաստանում լինելը: Կարծում եմ՝ նվագախմբի համար էլ: Ես հայկական համայնքի հետ մի փոքր շփում ունեցել եմ: Վիեննայում էլ հայ ծանոթներ ունեմ: Հայրս Իվան Ղալամյանի մոտ է սովորել Նյու Յորքում: Նա սիրով էր խոսում իր մեծագույն ուսուցչի մասին: Իմ կարծիքով, հայերը տաղանդավոր ազգ են»,- Երևանում այսօր լրագրողների հետ հանդիպման ժամանակ ասաց Զուբին Մեթան:
Նրա ձևակերպմամբ՝ դիրիժորությունը կախարդական մասնագիտություն է. «Մենք ոչնչի չենք դիպչում, չենք նվագում գործիքով, ընդամենը կոորդինացնում ենք հարյուրավոր նվագող երաժիշտների»,- ասաց դիրիժորը:
«Երևանյան հեռանկարներ» փառատոնի հիմնադիր տնօրեն, գեղարվեստական ղեկավար Ստեփան Ռոստոմյանը Իսրայելի ֆիլհարմոնիկ նվագախմբի և Զուբին Մեթայի համերգը ևս մեկ բարձունք է համարում, որը կարողացել է հաղթահարել փառատոնը. «Անհավատալի է, որ այստեղ է դարի մեծագույն դիրիժորներից մեկը՝ Զուբին Մեթան, և իհարկե աշխարհի լավագույն նվագախմբերից մեկը՝ Իսրայելի ֆիլհարմոնիկ նվագախումբը»,- ասաց Ս. Ռոստոմյանը:
Կարդացեք նաև
Հավելենք, որ երևանյան համերգի ընթացքում կհնչեն Ռ. Շտրաուսի, Ա. Շյոնբերգի, Պ. Ի. Չայկովսկու գործերից:
Սիրանուշ ՀԱՅՐԱՊԵՏՅԱՆ
