«Ի վերջո, Սահմանադրությամբ ամրագրվելո՞ւ է «կայուն մեծամասնություն» եւ «երկրորդ փուլ» եզրույթները, քանի որ մեզ բաժանված նախագծում կա. դրանք փաստաթղթից հանվելո՞ւ են, թե՞ ոչ»,- այսօր, խորհրդարանում սահմանադրական բարեփոխումների վերաբերյալ լսումների ժամանակ այս հարցը հիմնական զեկուցող Վարդան Պողոսյանին ուղղեց ԲՀԿ խմբակցության ղեկավար Նաիրա Զոհրաբյանը`հիշեցնելով, որ ԲՀԿ խմբակցության պատգամավորների հետ քննարկումների ժամանակ հանձնաժողովի անդամներն ասել էին, որ այդ հարցերը կկարգավորվեն Ընտրական օրենքով: Հիշեցնենք, որ Վենետիկի հանձնաժողովի փորձագետներն էլ էին նման եզրակացություն տվել այդ դրույթների առիթով:
«Հանդիպման ժամանակ հստակ ասացինք, որ եթե կայուն մեծամասնություն չի ձեւավորվում առաջին փուլում կամ կոալիցիայի արդյունքում, ապա ԸՕ-ն կարող է նախատեսել ընտրությունների երկրորդ փուլ»,- հստակեցրեց Վարդան Պողոսյանը`հավելելով, որ այս տեքստում որեւէ փոփոխություն պատգամավորները չեն տեսնելու այնքան ժամանակ, քանի դեռ ԱԺ նախագահի լիազոր ներկայացուցիչը վերջնական տեքստ չի ներկայացնի:
Նաիրա Զոհրաբյանին հետաքրքրում էր նաեւ թե ներկայիս իրավիճակում, երբ սահմաններում այսքան լարված է, այս փուլում, որքանո՞վ է նպատակահարմար անցնել խորհրդարանական կառավարման համակարգին, մանավանդ, որ ունենք չկայացած կուսակցություններ: Տիկին Զոհրաբյանը նշեց, որ ԲՀԿ-ն խորհրդարանական կառավարման համակարգի կողմնակից է, բայց նաեւ մտահոգություն հայտնեց:
«Պատկերացրեք, եթե ունենայինք մի իրավիճակ, երբ նախագահը չունենար պառլամենտական մեծամասնություն: Նախագահն ունի պատասխանատվություն , բայց լիազորություն չունի: Մինչդեռ պատասխանատվություն ենթադրում է լիազորություններ: Պառլամենտական համակարգում չի կարող լինել մի իրավիճակ, որ ռեսուրսները եւ հնարավորությունները անհամատեղելի լինեն: 154 հոդվածը բոլոր հնարավորությունները սահմանել եւ ապահովել է: Նաեւ սրանք են, որ պառլամենտական համակարգի անցումը անհրաժեշտ են դարձնում հիմա, ոչ թե տասը տարի հետո»,- ասաց Վարդան Պողոսյանը:
Կարդացեք նաև
Նելլի ԳՐԻԳՈՐՅԱՆ
