Ինչպես տեղեկացրել ենք, Գյումրու դրամատիկական թատրոնի անձնակազմը վիրավորվել էր քաղաքապետարանի պաշտոնյաներից իրենց Գյումրու օրվա մշակութային միջոցառումներին չհրավիրելու համար: Նրանք, մասնավորապես նեղվել էին, որ այդ միջոցառումների ցանկում տեղի էր ունեցել նաեւ թատերագետ Լեւոն Մութաֆյանի Գյումրու դրամատիկական թատրոնի պատմությանը նվիրված «100 տարի և կես դար» գրքի շնորհանդեսը, որի մասին, սակայն, թատրոնի մարդիկ տեղյակ չէին եղել ու չէին մասնակցել:
Aravot.am-ի հետ զրույցում Գյումրու փոխքաղաքապետ Ռուբեն Սանոյանը այս թեմայի շուրջ պարզաբանել էր հետեւյալը. «Ես հեղինակի հետ ճշտել եմ, ինքն ասել է, որ ես հրավեր ուղարկել եմ իրենց իմ գրքի շնորհանդեսին: Քաղաքապետարանն էլ գիտենալով, որ հրավերը կա, ավելորդ է համարել մեկ անգամ եւս հրավեր ուղարկել: Իհարկե, այդ ամբողջ միջոցառումը քաղաքապետարանն էր կազմակերպել, բայց որ գրքի հեղինակն անձամբ է հրավիրել, մենք մտածել ենք, որ քաղաքապետարանի հրավերն արդեն երկրորդական կլիներ այդ դեպքում»:
Քիչ առաջ այս հարցին անդրադարձավ նաեւ թատերագետ Լեւոն Մութաֆյանն՝ ասելով. «Երեկ ես հեռախոսազրույց եմ ունեցել Ռուբեն Սանոյանի հետ: Նա հետաքրքրվեց, թե արդյո՞ք ես թատրոնին հրավիրել եմ: Ես ասացի, որ մեկ օր առաջ, ամսի 4-ին, ես շնորհանդեսի մասին տեղեկացրել եմ Տիգրան Վիրաբյանին և Լյուդվիգ Հարությունյանին:
Լյուդվիգը խոստացավ անպայման ներկա լինել: Եվ եկավ: Սակայն հատկապես Տիգրանը խիստ վիրավորված էր, որ նախօրոք թատրոնին չեն տեղեկացրել, չեն հրավիրել քննարկման, իրենք կարող էին շատ ավելի լավ տարբերակ առաջարկել և կազմակերպչական աշխատանքները վերցնել իրենց վրա:
Կարդացեք նաև
Ռուբեն Սանոյանին ես ասել եմ՝ այո՛, մեկ օր առաջ պրոդյուսերին և գլխավոր ռեժիսորին հրավիրել եմ, բայց դա ասել եմ Ռուբեն Սանոյանին միջոցառումից հետո: Ի դեպ, ասեմ, որ Լյուդվիգն էլ, Տիգրանն էլ շատ ոգևորված էին գրքով, նրանք ուրախացան, որ քաղաքապետը նման նվեր է արել: Սա բառացի կրկնում եմ: Բայց նրանք կցանկանային տոնականություն հաղորդել, անցկացնել թատրոնում՝ այսպիսով թատրոնը ևս մասնակից դարձնելով տոնին»:
Հիշեցնենք, որ Գյումրու դրամատիկական թատրոնի մենեջեր Տիգրան Վիրաբյանի Aravot.am-ին տված հարցազրույցից հետո, Գյումրու քաղաքապետ Սամվել Բալասանյանն անմիջապես արձագանքել է նրանց դժգոհությանը, իր մոտ է հրավիրել թատրոնի գլխավոր ռեժիսոր Լյուդվիգ Հարությունյանին ու Տիգրան Վիրաբյանին ու նրանց հետ զրուցել այս թեմայի շուրջ:
Նունե ԱՐԵՎՇԱՏՅԱՆ