ԱԺ-ում սեպտեմբերի 17-ին շարունակվում է Սահմանադրական փոփոխությունների նախագիծը հանրաքվեի դնելու հարցի քննարկումը:
ՀԱԿ խմբակցության պատգամավոր Նիկոլ Փաշինյանը հիմնական զեկուցող, սահմանադրագետ Վարդան Պողոսյանին հարց ուղղելիս մեր իրականությունից մի քանի դրվագ ներկայացրեց՝ ասելով, որ ուզում է պարզել դրանց կապը գործող Սահմանադրության հետ. «Օրինակ, Սյունիքի մարզպետ Սուրիկ Խաչատրյանը 2013-ի հունիսի 1-ին մարդ է սպանել իր տան բակում: Զինդատախազ Գեւորգ Կոստանյանը կոպիտ ձեւով կոծկել է Սուրիկ Խաչատրյանի մասնակցությունը միջադեպին: Դրանից հետո Կոստանյանը Սերժ Սարգսյանի կողմից առաջադրվել է գլխավոր դատախազի թեկնածու: Սուրիկ Խաչատրյանը նախկինում 3 անգամ դատված է եղել ու սա նրան չի խանգարել դառնալ Սյունիքի մարզպետ: Չնայած նա վերջին 20 տարում եղել է պետական պաշտոնյա, 2012-ի հայտարարագրում պաշտոնապես մոտ 20 մլն դոլար է հայտարարագրել»:
Հետո Նիկոլ Փաշինյանն անդրադարձավ Հայաստանի ֆուտբոլի ֆեդերացիայի նախագահ Ռուբեն Հայրապետյանին. «Ռուբեն Հայրապետյանը 2015-ի օգոստոսի 17-ին ֆուտբոլի ակադեմիայի լողավազանում հանգստացող տասնյակ մարդկանց աչքի առաջ ծեծի է ենթարկել եւ առեւանգել «Էյր Արմենիայի» տնօրեն Արսեն Ավետիսյանին: Իրավապահ մարմինները գործը կոծկել են եւ Հայրապետյանին պատասխանատվության չեն ենթարկել»:
Հաջորդ օրինակը, որ նշեց պարոն Փաշինյանը, վարչապետ Հովիկ Աբրահամյանի մասին էր. «Նա ՀՀ անկախությունից ի վեր եղել է բացառապես պետական պաշտոնյա, բայց 2013-ին Աբրահամյանի եւ իր կնոջ հայտարարագրած դրամական միջոցները կազմել են ավելի քան 6 մլն դոլար: Հովիկ Աբրահամյանը 2006-ին, երբ գյուղատնտեսական ոլորտը համակարգող նախարար էր, ըստ պաշտոնական հայտարարագրի, գյուղմթերքի իրացումից ստացել է 1.2 մլն դոլարի եկամուտ»:
Կարդացեք նաև
Հետո Նիկոլ Փաշինյանը անդրադարձավ ֆինանսների նախարար Գագիկ Խաչատրյանին. «Գագիկ Խաչատրյանը ողջ կյանքում եղել է բացառապես պետական պաշտոնյա, իսկ 96-ից աշխատում է Հարկային եւ մաքսային մարմիններում: 2012-ին ինքն ու կինը հայտարարագրել են ավելի քան 6 մլն դոլարի դրամական միջոցներ: Գագիկ Խաչատրյանի ընտանիքին են պատկանում բազմաթիվ ձեռնարկություններ, եւ նրա ընտանիքը Հայաստանի ամենահարուստ ընտանիքներից մեկն է, եթե ոչ ամենահարուստը»:
Նա հարց ուղղեց՝ գործող Սահմանադրության ո՞ր դրույթն է թույլ տվել եւ հնարավոր դարձրել կոռուպցիայի, չարաշահման, հովանավորչության այս երեւույթները եւ ձեր ներկայացրած Սահմանադրության ո՞ր դրույթները, հոդվածները կամ գլուխներն են, որ բացառելու են այս ամենը:
Մինչ Վարդան Պողոսյանը կպատասխաներ, ԱԺ նախագահ Գալուստ Սահակյանն արձագանքեց որ այդ հարցերը Սահմանադրության հետ չեն առնչվում, եւ ենթադրվում էր, որ պատասխան չպետք է ակնկալեր:
Իսկ Վարդան Պողոսյանը պատասխանեց, որ չի կարող գոյություն ունենալ մի Սահմանադրություն, որը կարող է բացառել այդ դեպքերը՝ պատգամավորի մեկնաբանություններով. «Որեւէ Սահմանադրություն չի կարող դա բացառել: Սահմանադրությունները կյանքի են կոչվում մարդկանց միջոցով, ավելի մեծ հավանականություն ունեն կյանքի կոչվելու, եթե հավասարակշռված իշխանական համակարգ կա, որտեղ իշխանության որեւէ ճյուղ մյուսի նկատմամբ գերակայություն չունի: Առնվազն դատական իշխանության՝ արդարադատության միջոցով բոլոր չարաշահումները պետք է վեր հանվեն: Մենք պետականության ստեղծումից քառորդ դար անց դեռեւս չունենք այդպիսի համակարգ եւ չունենք դատական իշխանության անկախության այնպիսի մակարդակ, որը բավարարի հանրությանը»:
Նիկոլ Փաշինյանի դիտարկմամբ՝ եթե Սահմանադրությունները կյանքի են կոչվում մարդկանց միջոցով, ուրեմն Սահմանադրությունը փոխելուց առաջ պետք է փոխել այն մարդկանց, ովքեր կյանքի են կոչում այն. «Եթե մարդիկ ոտի տակ են տալիս այս Սահմանադրությունը, ոչ մի բան չի խանգարի ոտի տակ տալ այս մյուս Սահմանադրությունը»:
Ըստ Վարդան Պողոսյանի,Սահմանադրության խնդիրը կայանում է նրանում, որ չարաշահումների հնարավորությունները նվազեցնի, բայց նման դեպքերը դրսում էլ են կատարվում: Պետք է անկախ դատարանների միջոցով պատասխանատվության կանչել նրանց, ովքեր խաթարում են իրավական պետության սկզբունքը:
Հռիփսիմե ՋԵԲԵՋՅԱՆ
