«Հայաստանի մտավորականների խորհուրդը» նոյեմբերի 26-ին գումարել էր իր հերթական համաժողովը: Համաժողովին ներկա էր նաեւ Երվանդ Մանարյանը, նա իր ելույթի ընթացքում անդրադարձավ Վարդուհի Վարդերեսյանի մահվանը՝ նշելով, որ գեղեցիկ մեկը հեռացավ մեզնից, նա խնդրեց ներկաներին մեկ րոպե լռությամբ հարգել դերասանուհու հիշատակը:
Երվանդ Մանարյանը խնդրեց լրջորեն վերաբերվել իրավիճակին, քանի որ այն առնչվելու է յուրաքանչյուրի ընտանիքի. «Սա երկրի հարցն է, մենք երկիր ենք ավանդում մեզնից հետո եկողներին, հնարավորինս սկզբունքային: Այդ պատասխանատվությունը մեզնից անբաժան լինի: Ինձ թվում է այստեղ սպիտակ գլուխներն ավելի շատ են, դա երեւի նրանից է, որ պատասխանատվությունը շատ է այս օրերին: Ցանկալի կլինի, որ մենք կարողանանք այդ կամուրջն անցնել այնպես, որ իմանանք ունենալու ենք հաղթանակ, որ ոգու հաղթանակ լինի, որ մեր զավակները մեզնից չամաչեն: Մենք չենք լինի երեւի, ես իմ տարիքից ելնելով եմ ասում, բայց ես գիտեմ, որ իմ թոռները եւ ծոռներն այս հարցերին կանդրադառնան, երբ չեն կարողանա ինձ հետ խոսքի բռնվել, բայց ես գիտեմ, ինչ եմ թողնում»:
Երվանդ Մանարյանը նշեց, որ հավաքները հենց այնպես չեն անցկացնում, դրանց միջոցով պետք է կարողանալ ոգին փոխանցել շրջապատին: Նա հայտարարեց, որ կարծում է, հայ ժողովուրդը կկարողանա այդ դժվարությունները հաղթահարել:
«Պատասխանատվությունը մենք բոլորս պետք է զգանք, եւ կարողանանք հասցնել իր ճիշտ ավարտին: Մեծ երկիր ենք ունեցել, երկրի կեսը լավ է, ինչպես վայել է աշխարհին, բայց չպետք է մոռանանք մյուս կեսի մասին»,- ասաց նա:
Կարդացեք նաև
Ամի ՉԻՉԱԿՅԱՆ
