Գյումրիում այսօր «Նոր Հայաստան» հանրային փրկության ճակատի հանրահավաքը վարող Գարեգին Չուքասզյանը իր խոսքը սկսեց այսպես. «Բարեւ «Ոչ-ի քաղաք Գյումրի … Եթե հանրապետությունում կա մի քաղաք, որտեղ ամենաշատն ես զգում, որ երկիրը վերածվել է խանության, եւ որ ժողովուրդն ամենօրյա հոգեբանական ճնշման է ենթարկվում, դա Գյումրին է: Բայց հենց Գյումրին է այն քաղաքը, որը բազմիցս ապացուցել է իր արժանապատվությունը՝ «ոչ» ասելով թե համապետական, նախագահական ընտրություններում՝ գործող նախագահ կոչվածին, եւ «այո» ասելով Րաֆֆի Հովհաննիսյանին: Նույն Գյումրի քաղաքն է, որ այս տարի երկրի ստրկամիտ ղեկավարության կեցվածքին հակադրեց իր արժանապատիվ դիրքը Պերմյակովի հայտնի դեպքերի ժամանակ: Մենք եկել ենք Գյումրի՝ ամփոփելու այս քարոզարշավը, եւ մենք շատ լավ գիտենք, որ Գյումրիում «այո» գոյություն չունի, «այո» սահմանադրական փոփոխություններին գոյություն չունի»:
Գարեգին Չուքասզյանն ասաց, որ իրենք եկել են «ոչ» ասելու ոչ միայն սահմանադրական փոփոխություններին, այլեւ հանցավոր ռեժիմին: Հետաքրքիրն այն է, որ երբ բանախոսը բացականչում էր՝ «ոչ», հավաքվածները, հավանություն տալով նրա խոսքին, բղավում էին «այո՜»: Այնուհետեւ միտինգավորները բացականչեցին. «Սերժիկ, հեռացի՛ր»: Մի կինն էլ արձագանքեց. « Նամուս պիտի ունենա, որ հեռանա»:
Գարեգին Չուքասզյանն ասաց, որ փոփոխությունների ժամանակը մոտեցել է ու հարցրեց՝ հիմա ո՞ւր է ուզում ժողովուրդը գնա՝ Դեր Զո՞ր, թե՞ Մուսա լեռ: Ժողովուրդը բացականչեց՝ Մուսա լեռ:
Կարդացեք նաև
Նունե ԱՐԵՎՇԱՏՅԱՆ
