«Հայաստան-ՆԱՏՕ հարաբերություններով բավարարված ենք»,- այսօր նման հայտարարություն արեց ՆԱՏՕ-ի Հարավային Կովկասի բաժնի պատասխանատու Շտեֆեն Էլգերսմանը` «Հայաստան-ՆԱՏՕ հարաբերություններ. հեռանկարներն ու մարտահրավերները ՆԱՏՕ-ի Վարշավյան գագաթաժողովին ընդառաջ» քննարկման ժամանակ:
«Շաբաթվա սկզբին ՆԱՏՕ-ի պաշտոնյաները Հայաստանում պաշտպանության եւ ԱԳ նախարարի հետ քննարկել են ՆԱՏՕ-Հայաստան անհատական գործողությունների ծրագրերը: Հաջորդ շաբաթ Հյուսիսատլանտյան խորհուրդը հանդիպում է նախատեսում Հայաստանի ԱԳ եւ պաշտպանության նախարարների հետ: Մենք բավարարված ենք ՆԱՏՕ-Հայաստան հարաբերությունների զարգացումներով: Քսան տարվա պատմություն ունենք: Հաշվի առնելով Հայաստանի չափը եւ անվտանգության մարտահրավերները, Հայաստանի մասնակցությունը ՆԱՏՕ-ի առաքելություններին, շատ տպավորիչ է: Տպավորիչ է նաեւ երկարատեւ գործնական հարաբերությունները մի շարք այլ ոլորտներում: Ձեր խաղաղապահ գործունեությունն անցած տարի հասավ բարձրագույն մակարդակի»,- ասաց ՆԱՏՕ-ի պաշտոնյան:
Նա նկատեց, որ Հայաստանը եւ ՆԱՏՕ-ն արդյունավետ համագործակցում են պաշտպանական բարեփոխումների ծրագրերում, «շարունակում ենք էական ռազմական համագործակցությունը, ցանկանում ենք ԱԳՆ-ի եւ խորհրդարանական ոլորտներում առավել խորացնել հարաբերությունները»: Բանախոսը նկատեց, որ թեեւ աշխարհը արագ փոփոխվում է, բայց ՆԱՏՕ-Հայաստան այս համագործակցությունը կայուն պիտի լինի:
Խոսելով ՆԱՏՕ-ի համար առաջնահերթություն հանդիսացող երկու ուղղությունների մասին, ՆԱՏՕ-ի պաշտոնյան ասաց. «Մենք բաց ենք հարաբերությունների առումով, բայց երկու սկզբունք պիտի մնա`հարգանքը`կատարած ընտրության առումով եւ Հայաստանը պետք է լինի պրակտիկ եւ ստեղծագործական»:
Կարդացեք նաև
Նելլի ԳՐԻԳՈՐՅԱՆ
