Aravot.am-ի հետ զրույցում լրագրող, հրապարակախոս, ազատամարտիկ Սուրեն Սարգսյանը կոչ արեց ՀՀ իշխանություններին պաշտպանական մարտերից անցնել հարձակվողականի:
Նա մասնավորապես նշեց. «Եթե առավոտյան այս ամբողջը չկանգնի, ուրեմն մեր պետությունը թող կոչ անի, գնանք մեր կիսատ գործը անենք: Դեռ Շահումյան, Նախիջևան ունենք ազատագրելու: Եկեք վերջացնենք սրանց հարցերը, թքած էդ միջազգային կառույցների վրա»:
Հիշեցնենք, որ ապրիլի 1-ի լույս 2-ի գիշերը շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակողական գործողություններ` այլ զինատեսակների հետ միասին օգտագործելով հրետանի, զրահատեխնիկա և օդուժ: Բացի առաջնագծում ընթացող մարտերից, հակառակորդը հրետանային հարվածներ է հասցրել խաղաղ բնակավայրերի և մի շարք զորամասերի մշտական տեղակայման վայրերին: Հայկական կողմն այս պահի դրությամբ ունի 18 զոհ և 35-ին մոտ վիրավոր:
Մեր այն հարցին` միջազգային հանրության արձագանքը կատարվածին ի՞նչ ազդեցություն կունենա, և ինչպե՞ս կգնահատի Մոսկվայում` երկու կողմերի միջև բանակցություններ կազմակերպելու առաջարկը, պարոն Սարգսյանը պատասխանեց. «Երբ մարդու տուն են ներխուժում, նա թքած ունի բոլոր տեսակի, այդ թվում միջազգային կառույցների կարծիքների վրա: Հարձակվել են մեր երկրի վրա հերթական անգամ, դավադրաբար, և թե ինչ կորոշեն միջազգային կառույցները, հարցի երրորդական, չորրորդական կողմն է: Կարևորը մեր տղերքը համապատասխան պատասխան տվեցին»:
Կարդացեք նաև
Ըստ ազատամարտիկի` սա քիչ էր մեր ունեցած 18 զոհի համար: Ըստ պարոն Սարգսյանի` ՀՀ իշխանությունները քաղաքական լուրջ որոշում պետք է կայացնեն, այնքան հետ շպրտենք, որ մյուս անգամ մոռանան մերձավոր գյուղը:
Սուրեն Սարգսյանը դրական է գնահատում այն, որ ընդդիմադիր, թե դիմադիր, անգամ Սերժ Սարգսյանին ծայրահեղ քննադատության ենթարկողները հայտարարեցին, որ պատրաստ են մի կողմ դնել տարաձայնությունները և գնալ սահման:
Դառնալով Սարգսյան-Ալիև հանդիպման` Մոսկվայում կազմակերպելու առաջարկին` պարոն Սարգսյանը այն համեմատեց կատվի վազքի հետ. «Նման հանդիպումն առաջինը չէ: Բայց դա կատվի վազքի պես է, մինչև մարագ հասնելն է: Հենց ուզում են մի խնդիր լուծել, նորից մեր զինվորների արյան հաշվին են լուծում: Կոչ եմ անում մեր իշխանություններին` մեկ անգամ մի կարգին դաս տանք այդ մարդկանց: Եթե պիտի կռվենք, գնանք կռվենք: Սա ի՞նչ վերաբերմունք է: Հա լսում ենք սրան-նրան, հա մտածում ենք միջազգային կառույցները ինչ կասեն: Պետք է պատժել, որ եկար, հարձակվեցիր տանս վրա, այնպես կավերենք, որ մեկ էլ մոռանաք: Մեկ անգամ պետք է համարժեք պատասխան տրվի: Չճամարտակենք, մենք բոլորս պատրաստ ենք. իմացողը կգնա կկռվի, փառք Աստծո, բանակը կա, մենք փորձ ունենք, տարածքները գիտենք: Պատրաստ ենք: Որ պահին մեր պետությունը կասի դուրս ենք գալիս, տղերք, դուրս կգանք, ու ինչ որ կիսատ ենք թողել, ավարտին կհասցնենք»:
Մեր հարցին` այժմ ժամանա՞կն է. «Վաղուց ժամանակն է ցուց տալ այդ մարդկանց իրենց տեղը: Երկու կողմն էլ ժողովուրդ է, մենք էլ զինվոր ունենք, նրանք էլ, բոլորի սիրտն էլ իր կորուստների համար ցավում է: Ժողովուրդը մեղք չունի, մեղք ունեն այդ մեծ ու փոքր խաղերը, այդ թվում միջազգային կառույցները: Մեկ անգամ մարդավարի պատասխան պիտի տանք: Առանց ավելորդ հոխորտանքների և ճամարտակելու թող պետությունը քաղաքական որոշում կայացնի, փառք Աստծո, դեռ մենք կանք, և վստահաբար մի քանի կռվի հնարավորություն ունենք»:
Հարցին` այս պահին իրավիճակի կայունացման հեռանկար կա՞, պարոն Սարգսյանը պատասխանեց. «Հիմա իրենք նոկդաունի մեջ են, ուզում են հասկանալ, չէին պատկերացնում, որ նման պատասխան կստանան»:
Սուրեն Սարգսյանը շեշտեց, թե կռիվ են ուզում, մեկ անգամ ազգովի, մարդավարի կռիվ տանք, մենք ի վիճակի ենք, թե չէ խնամի-բարեկամ տանել բերելով հոգնեցինք, մեր զինվորներն էլ ափսոս են:
Սուրեն Սարգսյանը եզրափակեց. «Պետք է լուրջ պատժել, հայտարարել, որ մենք ձեզ պատժելու ենք, ինչքան կարելի է: Մեր երկիրը փորձադաշտ չէ, որ հարևանները երբ ուզեն մտնեն խփեն, այս անեն, այն անեն, բոլորիս համար դա պատվի հարց է»:
Տաթև ՀԱՐՈՒԹՅՈՒՆՅԱՆ
