Վրաստանի պաշտպանության նախարար Թինաթին Խիդաշելին օրենք է ստորագրել, որի համաձայն` Վրաստանում դադարեցվում է պարտադիր զինվորական ծառայությունը։ Այս մասին տեղեկացնում է Sputnik միջազգային լրատվական գործակալության վրացական ծառայությունը։
Անդրադառնալով պարտադիր զինվորական ծառայության վերացմանը՝ Վրաստանի պաշտպանական գերատեսչության ղեկավարն ասել է. «Իմ խոստումներից մեկը Վրաստանում պարտադիր զինվորական ծառայության վերացումն էր։ Առանց այն էլ բոլորը պետք է ցանկանան ծառայել Վրաստանի զինված ուժերում, քանի որ մեր զինված ուժերը արժանի են դրան, իսկ ով չի ուզում, մենք բռնի չենք ստիպելու»։
Ուշագրավ է, որ Խիդաշելին պարտադիր զինվորական ծառայության վերացման մասին օրենքը ստորագրել է ԶԼՄ-ների ներկայությամբ։
Տեղեկացնենք, որ այսօրվա դրությամբ՝ Վրաստանի ԶՈՒ-ն բաժանվում է 4 մասի՝ պարտադիր, պայմանագրային, կադրային և պահուստային։ Պարտադիր զինվորական ծառայությանը ենթակա են Վրաստանի 18-27 տարեկան քաղաքացիները։ Վրաստանում պարտադիր զինվորական ծառայության ժամկետը մեկ տարի է։
Կարդացեք նաև
