Հայաստանի պետական կամերային երգչախմբի տնօրեն Արմեն Արաբյանը տպավորված է Գյումրիի Վարդանանց հրապարակում` Հռոմի ֆրանցիսկոս պապի մատուցած պատարագով: «Խորան էր սարքված, իսկ խորանին կից բեմ էր` երգչախմբերի համար: 6-րդ դարից սկսած որեւէ Պապ Վատիկանից դուրս պատարագ չի մատուցել, եւ սա եզակի դեպք էր:
Ընդ որում` անցկացվեց կաթոլիկ պատարագ` լատինական երգեցողությամբ, որը կատարեց Հայաստանի պետական կամերային երգչախումբը`Ռոբերտ Մլքեյանի ղեկավարությամբ»,- Aravot.am-ի հետ զրույցում ասաց պարոն Արաբյանը:
Նա հավելեց, որ Կամերային երգչախումբը հարստացնելու նպատակով իրենց էին միացրել «Սաղմոսերգու» տղամարդկանց երգչախումբը` Վահե Բեգոյանի ղեկավարությամբ եւ «Տիրամայր Հայաստանի» աղջիկների երգչախումբը: Հայաստանի պետական կամերային երգչախմբի տնօրենը հավաստիացրեց, որ Հռոմի պապը շատ էր հուզվել, կաթոլիկ պատարագից հետո հատուկ մոտեցել ու շնորհակալություն է հայտնել պրոֆեսիոնալ կատարման համար: Արաբյանի խոսքերով, Հռոմի պապն ասել է, որ չէր պատկերացնում, թե Հայաստանում կլսի նման բարձրարվեստ երգեցողություն:
Կարդացեք նաև
Երեք երգչախմբերն էլ ոգեւորված են եղել, աշխատել են ինքնակամ եւ հաճույքով: «Մեծ ոգեւորությամբ են մասնակցել պատարագին եւ Կամերային երգչախումբը , եւ նրան միացած երկու փոքրիկ երգչախմբերը: Մոտավորապես մեկ ամիս նախապատրաստվում էինք, իսկ Ռոբերտ Մլքեյանն անընդհատ մեկնում էր Երեւանից Գյումրի, Գյումրիից Երեւան»,- նշեց Արմեն Արաբյանը:
Նա նաեւ հույս հայտնեց, որ Հռոմի պապի այցելությունից հետո շատ-շատերը կվերանայեն իրենց ապրելակերպն ու կենցաղավարությունը:
Գոհար ՀԱԿՈԲՅԱՆ
Լուսանկարները տրամադրել է Արմեն Արաբյանը:
