Երեկ պարեկապահակային գնդի տարածքում տեղի ունեցած հրաձգության արդյունքում Էրեբունի բժշկական կենտրոն տեղափոխված «Սասնա ծռեր» խմբի երկու անդամներին վիրահատել են։ Այս մասին Aravot.am-֊ին հայտնեցին բժշկական կենտրոնից։
Ոստիկանների եւ «Սասնա Ծռեր» խմբի միջեւ տեղի ունեցած հրաձգությունից տուժել են ՊՊԾ գնդի տարածքը զինված հարձակմամբ գրաված խմբի անդամներ 50-ամյա Աշոտ Պետրոսյանը եւ 29-ամյա Հովհաննես Հարությունյանը․ նրանք ոտքերից հրազենային վիրավորում էին ստացել։
Ըստ բժշկական կենտրոնի լրատվական ծառայության, Աշոտ Պետրոսյանը ստացել է զույգ ստորին վերջույթների հրազենային-գնդակային վիրավորում եւ աջ ազդոսկրի կոտրվածք, իսկ Հովհաննես Հարությունյանը ստացել է աջ ազդոսկրի կույր գնդակային վիրավորում, աջ սրունքի միջանցիկ գնդակային վիրավորում, աջ սրունքի կոտրվածք:
Երկու վիրավորների գիտակցությունը տեղն է, հաշվի առնելով նրանց վիճակը, ըստ բ/կ-֊ի լրատվականի, հետվիրահատական փուլը կարճ կտեւի, քանի որ երկուսն էլ միջին ծանրության վնասվածքներ են ստացել։
Նելլի ԲԱԲԱՅԱՆ
Կարդացեք նաև
Հ. Գ. Ըստ ՄԻՊ խոսնակի տարածած հաղորդագրության՝ «Փոխհրաձգության հետևանքով վիրավորում ստացած Աշոտ Պետրոսյանին և Հովհաննես Հարությունյանի դեպքի կապակցությամբ Մարդու իրավունքների պաշտպանի ներկայացուցիչներն այս պահին գտնվում են «Էրեբունի» բժշկական կենտրոնում»:
