Վերաքննիչ քրեական դատարանում դատավոր Ա. Ազարյանի նախագահությամբ վաղը նշանակված է «Սասնա Ծռեր» խմբի անդամների գործով կալանքի բողոքարկման վերաբերյալ առաջին դատական նիստը. դռնփակ դատական նիստում տեղի կունենա Հովհաննես Հարությունյանի (լուսանկարում) կալանքի բողոքարկումը: Այս մասին Aravot.am-ին հայտնեց Հովհաննես Հարությունյանի պաշտպան, փաստաբան Հայարփի Սարգսյանը:
Ըստ նրա` Հովհաննես Հարությունյանին կալանավորելու մասին որոշումն անհիմն է, քանի որ հուլիսի 26-ին վիրահատվելուց անմիջապես հետո նրան տեղափոխել են դատապարտյալների հիվանդանոց. «Նա զրկված է տեղաշարժվելու հնարավորությունից, ունի հենաշարժողական համակարգի խնդիր, աջ ոտքի հրազենային երկու վնասվածք: Նրան եւս մեկ վիրահատություն է սպասվում` պրոթեզավորում: Այնուամենայնիվ, դատարանը որոշեց կալանավորել»:
Հայարփի Սարգսյանը հայտնեց, որ ամեն օր այցելում է դատապարտյալների հիվանդանոց. միայն փաստաբանին է տրված այդ իրավունքը: Ըստ նրա` լրատվամիջոցներով աղմուկ բարձրացնելու եւ իր ջանքերի արդյունքում Հարությունյանին նախորդ` հակասանիտարական վիճակում գտնվող հիվանդասենյակը նախորդ շաբաթ օրը փոխվել է, սակայն նոր հիվանդասենյակը նույնպես համապատասխան չէ` լիարժեք բուժման համար. «Կրկին նույն խավարասերներն էին… կարելի է ասել` միայն պատերն են փոխվել: Նա պետք է տեղափոխվի քաղաքային հիվանդանոց, քանի որ բուժհսկողության կարիք ունի: Այդ փաստն էլ բողոքարկման մի մասն է արտահայտում»:
Հետաքրքրվեցինք` դատապարտյալների հիվանդանոցում կա՞ համապատասխան մասնագետ, քանի որ փաստաբանները բարձրաձայնել էին այդ խնդիրը: Հայարփի Սարգսյանը տեղեկացրեց, որ Հովհաննես Հարությունյանին անհրաժեշտ է վնասվածքաբան եւ ուժեղ հսկողությամբ բուժսպասարկում. «Դատապարտյալների հիվանդանոցում կան որոշ բժիշկներ, բայց ոչ մշտական: Հովհաննես Հարությունյանը գիշերներն ուժեղ ցավեր է ունեցել, ձայն է տվել, նրան անգամ չեն լսել: Անգամ համապատասխան կոճակ չկա, որ անհրաժեշտության դեպքում կանչի բժշկին: Նման տարրական բաները եւս բացակայում են»:
Կարդացեք նաև
Հիշեցնենք, որ ըստ «Դատապարտյալների հիվանդանոց» ՔԿ-ի հայտարարության` «Սասնա ծռերից» Արամ Մանուկյանը, Հովհաննես Հարությունյանը և Աշոտ Պետրոսյանը ստանում են պատշաճ բժշկական օգնություն:
Լուիզա ՍՈՒՔԻԱՍՅԱՆ
