Այսօր Վերաքննիչ դատարանում Անդրիաս Ղուկասյանի կալանքը՝ որպես խափանման միջոց փոխելու դիմումի քննությունը հետաձգվեց: Նրա պաշտպան, փաստաբան Լուսինե Սահակյանն ասաց, որ իրենք միջնորդություն էին ներկայացրել դատարան, որպեսզի Անդրիաս Ղուկասյանը ներկա լինի դատական նիստին ու հայտնի իր դիրքորոշումը: Դատարանը բավարարել է միջնորդությունը եւ դատական նիստը հետաձգել մինչեւ ամսի 24-ը, որպեսզի ապահովի նրա ներկայությունը:
Լուսինե Սահակյանի խոսքերով՝ «Անդրիաս Ղուկասյանը գտնում է, որ ինքը ցանկանում է դատարանում ներկայացնել նաեւ սեփական դիրքորոշումը: Նաեւ ցանկանում է որոշել՝ ցանկանո՞ւմ է դատավորին ինքնաբացարկ ներկայացնել, թե՞ ոչ: Շատ դժվար կլինի նրան՝ չտեսնելով դատավորին եւ դատական նիստին ներկա չլինելով՝ որոշել դա: Բացի դրանից, նաեւ կախված նրանից, թե դատախազը ինչպիսի դիրքորոշում կհայտնի, հնարավոր է, որ նա եւս ունենա իր կարծիքն արտահայտելու իրավունքը»:
Լուսինե Սահակյան ասաց, որ հիմա շատ դժվար է որոշել դատարանի տրամադրվածությունը:
Հռիփսիմե ՋԵԲԵՋՅԱՆ
