«Թուրքիայի անկայուն վիճակը բացասական ազդեցություն ունի նաև Հայաստանի համար»,-«Մեդիա կենտրոնում» հրավիրված «Թուրքիայում հեղաշրջման ձախողված փորձը և դրա հետեւանքները Հայաստանի համար» թեմայով քննարկմանը մտահոգություն հայտնեց ՀՀԿ խմբակցության պատգամավոր Շիրակ Թորոսյանը: Ըստ նրա` Թուրքիան իր գործողություններում հակահայկական կեցվածքով ու դիրքորոշումներով, շրջափակմամբ, ղարաբաղյան հակամարտությունում Ադրբեջանին ցուցաբերած բացահայտ աջակցությամբ արդեն մարտահրավեր է:
Իհարկե, պատգամավորը չկարողացավ հստակ նշել, թե Թուրքիայում ռազմական հեղաշրջման հաջողման դեպքում արդյոք Հայաստանի հետ կապված որոշակի խնդիրներ կառաջանայի՞ն, թե՞ ոչ, բայց Թուրքիայի ներկայիս ապակայունացած վիճակը կարող էր հղի լինել Հայաստանի համար բացասական հետևանքներով:
Շիրակ Թորոսյանի համար բարդ է հավատալ, որ Թուրքիայում ռազմական հեղաշրջման փորձը ներսից կազմակերպված էր. «Որոշակի տարրեր, այնուամենայնիվ, կան թուրքական ներկայիս քաղաքականության մեջ, որ կարող են կասկածներ ծնել, թե հեղաշրջման փորձը ներսից սարքված էր: Օրինակ` «Իսլամական պետությունը» Թուրքիայի կողմից ծնված երևույթ է, բայց այսօր արի ու տես Թուրքիայում ահաբեկչական ակտեր են տեղի ունենում, որոնցից ոմանք Իսլամական պետությունն է ստանձնում: Արդյոք դա չի՞ նշանակում, որ այս ամենն ունի կազմակերպված բնույթ»:
Տաթև ՀԱՐՈՒԹՅՈՒՆՅԱՆ
Կարդացեք նաև
Լուսանկարը` «Մեդիա կենտրոն»-ի
