Այսօր Երեւանում առաջին ձյունն է տեղացել: Այս առնչությամբ այսօր ԱԺ-ում Aravot.am-ի հարցին փոխքաղաքապետ Կամո Արեյանը նախ արձագանքեց. «Աչքներս լույս, լավ բան է՝ առաջին ձյուն»:
Մենք ճշտեցինք՝ բայց Ձեր համար լա՞վ բան է, որովհետեւ միշտ ձնամաքրման աշխատանքների հետ կապված լուտանքներ են լինում քաղաքապետարանի հասցեին՝ Կամո Արեյանը վստահեցրեց, որ իհարկե, առաջին ձյունը լավ է. «Բնություն, ձյուն, առաջին, էն էլ՝ առաջին: Առաջին սերը, ինչպես որ հացը, միշտ կուտ է գնում: Առաջին ձյունը, ինչպես սերը, միշտ հալվում է ու գնում»:
Մեր հարցին՝ իսկ երկրորդ ձյանը պատրաստվո՞ւմ է քաղաքապետարանը, ինչպե՞ս է պատրաստվում՝ ավանդական աղ ու ավազո՞վ՝ նա պատասխանեց. «Պատրաստվում ենք: Բնության առջեւ ոչ մեկը չի կարող ասել՝ բնություն, ես քո առջեւ 100 տոկոս պատրաստ եմ: Բնության անակնկալները անկանխատեսելի են, բայց մեր եղած ռեսուրսի մեջ մենք պատրաստվում ենք, որ քաղաքը սպասարկենք»:
Կարդացեք նաև
Մեր դիտարկմանը, որ Հիդրոմետը միշտ ասում է, երբ է ձյուն լինում ու միշտ, չգիտես ինչու, քաղաքապետարանի համար անակնկալ է լինում՝ Կամո Արեյանը պատասխանեց.«Երեւանում այսօր չունեինք ձյան կանխատեսում»:
Հռիփսիմե ՋԵԲԵՋՅԱՆ
