ՀՀ վերաքննիչ քրեական դատարանն այսօր մերժեց Ոստիկանության ՊՊԾ գունդը գրաված «Սասնա ծռեր» խմբին սնունդ տարած Արթուր Սարգսյանի («հաց բերող») պաշտպանի ներկայացրած՝ կալանավորման ժամկետը երկարեցնելու միջնորդությունը բավարարելու դեմ բողոքը: Այս մասին Aravot.am-ին հայտնեց Արթուր Սարգսյանի պաշտպան Դավիթ Գյուրջյանը (լուսանկարում):
«Դատարաններն այս գործերով հնարավորություն չունեն օբյեկտիվ ակտեր կայացնելու: Այս գործերով հստակ քաղաքական պատվեր կա՝ անկախ հիմքերի առկայության հանգամանքից՝ բոլորին պահել ազատազրկման մեջ այնքան ժամանակ, որքան պետք է»,-մեզ հետ զրույցում ասաց Դավիթ Գյուրջյանը:
Արթուր Սարգսյանը մեղադրվում է Ոստիկանության ՊՊԾ գունդը գրաված «Սասնա ծռեր» խմբին օժանդակելու մեջ: Նրա պաշտպանը մեղադրանքն անհիմն է համարում:
Կարդացեք նաև
Լուիզա ՍՈՒՔԻԱՍՅԱՆ
«Չնայած հանրության մեջ տարածված այն կարծիքին, թե օժանդակող Արթուր Սարգսյանի գործողություններն արտահայտվել են ընդամենը զինյալներին սնունդ հասցնելով, այնուամենայնիվ, կատարված նախաքննությամբ հիմնավորվել է, որ 2016թ. հուլիսի 26-ին ՊՊԾ գնդի տարածք մտնելուց հետո մինչև օգոստոսի 31-ն ընկած ժամանակահատվածում վերջինս կատարել է ինչպես զավթած տարածքն ու շենքերը, այնպես էլ պատանդառված բուժաշխատողներին պահելուն ուղղված ակտիվ գործողություններ: Մասնավորապես՝ Ա.Սարգսյանը կատարել է տարածք բերված բուժսարքավորումների, բուժաշխատողների բեռների ստուգում՝ իրավապահների կողմից ենթադրաբար տեղադրված գաղտնալսող սարքերի հայտնաբերման նպատակով, նորոգել է զինյալների կապի միջոցները, բացի այդ, անձամբ զինված իրականացրել է պատանդների պահպանությունը: »
https://www.aravot.am/2016/09/19/736960/