«Ինչ սկսվել են այս մասսայական մարզումները, ամեն շաբաթ օրը գալիս եմ: Ուզում եմ առողջ լինել, մարմիս սլացիկ պահել: Այս ընթացքում շատ բան է փոխվել իմ առօրյայում: Ամբողջ շաբաթվա ընթացքում օդի պես թեթեւ եմ զգում, հոգնել չկա ու տրամադրությունս միշտ բարձր է: Կոչ եմ անում, որպեսզի բոլորը միանան մեզ: Վստահ եմ՝ չեն զղջա», – ասում է Լանա Եղիազարյանը:
«Երկրորդ պարապմունքից գալիս եմ: Նպատակս առողջ ապրելակերպն է: Նախկինում զբաղվել եմ սուսերամարտով, երկու անգամ եղել Հայաստանի չեմպիոն: Բայց մեծ սպորտը թողնելուց հետո մի տեսակ «փակվել էի»: Հիմա լրիվ այլ վիճակ է: Աշխատում եմ ինձ վրա, զգում գրեթե այնպես, ինչպես ակտիվ սպորտի տարիներին: Ի դեպ, հաճախում եմ բալիկիս հետ: Նա նույնպես հաճույքով է մարզվում: Բոլորս շատ ուրախ ու արդյունավետ ժամանակ ենք անցկացնում միասին: Շնորհակալ եմ կազմակերպիչներին», – ավելացնում է Լիլիթ Գալստյանը:
Կարդացեք նաև
«Կյանքը՝ սպորտի ռիթմով» մասսայական-առողջարարական միջոցառումը արդեն կայացած նախաձեռնություն է, որին չխանգարեցին ոչ ցուրտ եղանակը, ոչ քամին, ոչ անձրեւն ու ձյունը: Արդեն ձեւավորվել է մշտապես մարզվողների մի մեծ խումբ, որը, վստահաբար, կբազմապատկվի գարնան գալուն պես:
Ծրագիրը կազմելիս, սպորտի եւ երիտասարդության հարցերի նախարարությունն ու Հայաստանի աէրոբիկայի եւ ֆիթնեսի ազգային ասոցիացիան նպատակ ունեին առողջ ապրելակերպը երիտասարդության եւ միջին տարիք ունեցողների շրջանում տարածել: Բայց երբ ստացվեց այնպես, որ շատերը գալիս էին իրենց երեխաների հետ, նոր իրավիճակ առաջացավ ու որոշվեց փոքրիկներին նույնպես ներգրավել մարզումների մեջ: Նրանց համար անմիջապես կազմվեց խաղային տարրերով շարժողական վարժությունների հատուկ համալիր, ինչի արդյունքում այսօր արդեն իրենց ծնողների հետ շաբաթը մեկ անգամ մարզվում են նաեւ փոքրիկները:
Աշոտ ՀԱԿՈԲՅԱՆ
