«Ես ուզում եմ զգուշացնել Հանրապետականներին՝ մենք ունենք ահազանգեր, որ մարդկանց տարել են ուրիշ տեղ էլ են գրանցել: Արդեն հանձնարարված է, ասել են՝ կքվեարկես այստեղ առավոտյան, քեզ կտանենք մի ուրիշ տեղ: Մենք նման լուր ունենք: Մենք ունենք նման փաստ: Սա համակարգ է, հրահանգ է, ինչ է՝ չգիտեմ»,- այսօր «Հայելի» ակումբում հայտարարեց «Ազատ դեմոկրատներ» կուսակցության վարչապետի թեկնածուն՝ Հրանտ Բագրատյանը:
Նա ասաց, որ փաստեր էլ ունեն հեռախոս բաժանելու մասին. «Լսել եմ՝ հեռախոսի խոստումներ կան մարդկանց: Նաեւ մեկ այլ կուսակցությունից խոստումներ գիտենք՝ գյուղացիներին: Մեզ ասել են, հիմա չեմ ուզում բարձրաձայնել»: Լրագրողները հարցրեցին՝ բա ե՞րբ եք բարձրաձայնելու՝ պարոն Բագրատյանը պատասխանեց. «Երբ որ փաստը տեղի կունենա: Բայց մենք հստակ ունենք փաստը, որ մոտեցել են մարդուն, ասել են՝ էսքան փողը ձեզ չէր խանգարի»:
Նա կոչ արեց ընտրակաշառք չվերցնել. «Մի քիչ մթնոլորտ ստեղծեք, այ ձեր ցավը տանեմ, էս երկիրը կկորի: Իրանում կաշառքով չի, Թուրքիայում կաշառքով չի, Վրաստանում կաշառքով չի, Ադրբեջանն էլ մալադեց, էլ չի անում, ընդհանրապես ասում է ընտրություն չլինի, ավելի լավ է այդպես անենք, ում որ պետք է դնենք թագավոր, ասենք՝ էլ ընտրություն չկա: Դա ավելի լավ է, քան այս վիճակը»:
Հռիփսիմե ՋԵԲԵՋՅԱՆ
