Հայաստանն ակտիվորեն աջակցում է Եվրասիական տնտեսական միության (ԵԱՏՄ) և Իրանի միջև ազատ առևտրի գոտու ստեղծմանը: Այս մասին «ՌԻԱ Նովոստիին» տված հարցազրույցում հայտարարել է Հայաստանի արտգործնախարար Էդվարդ Նալբանդյանը:
Երեքշաբթի Ռուսաստանի առաջին փոխվարչապետ Իգոր Շուվալովը պատրաստվում է այցելել Իրան՝ այդ երկրի և ԵԱՏՄ-ի միջև ազատ առևտրի գոտու շուրջ բանակցություններ վարելու համար: Նախատեսվում է, որ Շուվալովն աշխատանքային հանդիպումներ կունենա այդ երկրի արդյունաբերության, հանքերի և առևտրի նախարար Մուհամեդ Ռեզա Նեմաթզադեո և հաղորդակցությունների ու տեղեկատվական տեխնոլոգիաների նախարար Մահմուդ Վաեզիի հետ:
«Այս պահին քննարկվում է Իրանի և Եվրասիական տնտեսական միության միջև ազատ առևտրի գոտի ստեղծելու հնարավորությունը, որին մենք, իհարկե, ակտիվորեն աջակցում ենք»,- ասել է Նալբանդյանը:
Նա նաև ընդգծել է իրանական բիզնեսը հայկական շուկա ներգրավելու լայն հեռանկարները: Նալբանդյանի խոսքով՝ Թեհրանը և Երևանը շարունակում են միմյանց համար բիզնես-միջավայրի և ներդրումային հնարավորությունների բարելավմանն ուղղված աշխատանքները: «Այս գործընթացում կարևոր նշաձող է դարձել մեր երկրների միջև վիզային ռեժիմի չեղարկումը, որը նաև կնպաստի երկկողմ առևտրա-տնտեսական կապերի խորացմանը»,-ասել է նա:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
