www.arfd.info. ՀՅԴ Բիւրոյի անդամ Բենիամին Պչաքճեան եւ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի, երեսուն վայրկեան տեւողութեամբ հանդիպում մը ունեցան Պաղեստինեան իշխանութեան նախագահ Մահմուտ Ապպասի հետ` ընդառաջելով նախագահի հրաւէրին: Հանդիպումին ներկայ էին նաեւ Ապպասի ընկերակցող պատուիրակութեան անդամներ:
Հանդիպումի ընթացքին նախագահ Ապպաս անդրադարձաւ հայ եւ պաղեստինցի ժողովուրդներու պայքարի նոյնութեան, ինչպէս նաեւ պաղեստինեան դատին նկատմամբ հայ ժողովուրդին ու յատկապէս ՀՅ Դաշնակցութեան ցուցաբերած զօրակցութեան:
Խօսակցութեան ընթացքին անդրադարձ կատարուեցաւ շրջանային ու միջազգային իրադարձութիւններուն եւ անոնց ազդեցութեան` պաղեստինեան դատին վրայ:
Յատուկ քննարկումի նիւթ դարձաւ Երուսաղէմի հայութեան եւ հայապատկան կալուածներուն հետ առնչուող հարցերը, որոնց գծով նախագահ Ապպաս յիշեցուց, որ նոյնինքն Եասէր Արաֆաթ հայութեան հետ կապուած խնդիրներուն նկատմամբ անզիջող կեցուածք ցուցաբերած է ընդհանրապէս եւ պաղեստինեւիսրայէլեան բանակցութեանց ընթացքին մասնաւորապէս:
Հանդիպումի աւարտին, պաղեստինեան պատկերասփիւռի կայաններուն հարցումներուն պատասխանելով, երեսփոխան Բագրատունի շեշտեց, որ ՀՅ Դաշնակցութեան համար բռնագրաւողին դիմադրելը սրբազան դատ է եւ թէ՛ պաղեստինցի եւ թէ՛ հայ ժողովուրդները ունին իրաւազրկուածի նոյն վիճակն ու պայքարելու նոյն հաստատակամութիւնը` յիշելով, որ Պաղեստինի հայութիւնը անքակտելի մէկ բաժինն է պաղեստինցի ժողովուրդին ու անոր պայքարին:
«ԱԶԴԱԿ»
