Այսօր Շահումյանի գերեզմանատան հարակից սգո սրահում Արթուր Սարգսյանի՝ «Հաց բերողի» հոգեհանգստի արարողությունն էր: Նա մահացել էր մարտի 16-ին՝ «Արմենիա» բժշկական կենտրոնում ՝ սրտանոթային անբավարարությունից:
Քաղաքացիների հոսքը չէր դադարում, գրեթե բոլորը մտնելիս ափսոսանքով ասում էին՝ «Ափսոս, մի լավ, լուսավոր մարդ էլ պակասեց»: Հարազատներին ցավակից լինելու եւ ինչպես իրենք էին ասում՝ իրենց հոգու պարտքն էին կատարում նաեւ մի շարք քաղաքական գործիչներ, արվեստագետներ, մտավորականներ:
Վարդան Օսկանյանը եւս այնտեղ էր: Նա լրագրողների հետ զրույցում ասաց, որ Արթուր Սարգսյանի մահվան մեջ մեղավոր են երկրորդ անգամ կալանման որոշում կայացնողները. «Նման որոշումները նույնիսկ քննիչների մակարդակով չեն կայացվում: Գնում է դեպի վերեւ. զանգում, հարցնում են՝ անենք, թե՝ չէ: Ով որ վերջնական որոշումը կայացրել է՝ նա մեղավոր է»:
Կարդացեք նաև
Նա անուններ չհնչեցրեց, սակայն հաստատեց լրագրողների այն տեսակետը, որ որոշումը քաղաքական է եղել:
Իսկ այն կարծիքը, որ Արթուր Սարգսյանը փորձել է միանալ ՕՐՕ դաշինքին եւ երկրորդ կալանավորումը դրա հետ է կապված եղել՝ պարոն Օսկանյանը հերքեց: Անմեղ-մեղավորի հարցը դարձյալ շոշափելիս՝ ասաց «Բայց որ մեղավորը իշխանությունն է, այստեղ երկու կարծիք չի կարող լինել»:
Նման երեւույթի պատճառը Վարդան Օսկանյանը համարեց այն, որ այս իշխանությունները քաղաքական հնարավոր բոլոր ճանապարհները երկրում փոփոխություն անելու համար փակել են. «Այլապես ինչի պիտի զենքի դիմեին մարդիկ»:
Հիշեցնենք, որ Արթուր Սարգսյանը մեղադրվում էր «Սասնա ծռեր» զինված խմբին հաց տանելու՝ օժանդակելու մեջ: 2016 թվականի դեկտեմբերի 31-ին ազատ էր արձակվել՝ ազատազրկման հետ անհամատեղելի հիվանդության պատճառով, սակայն, փետրվարի 9-ին կրկին կալանավորվել էր: Արթուր Սարգսյանը այդ ժամանակ հայտարարել էր հացադուլ՝ պահանջելով փոխել իր խափանման միջոցը՝ կալանքը: 27 պատգամավորների երաշխավորությամբ Արթուր Սարգսյանը ազատ էր արձակվել եւ անմիջապես տեղափոխվել «Արմենիա» բժշկական կենտրոն, որտեղ եւ կարճ ժամանակ անց մահացավ:
Անուշ ՄԱԹԵՎՈՍՅԱՆ
